AktieTips

Ilinniartut piginneqataassutinik niueruteqartartutut misiliisut

Danmarkimi kalaallit ilinniagaqartut peqatigiiffiat, Avalak, Grønlandsbankenip aktianik unammisitsinerani AktieTipsimi VIP-mik unammeqataasut akornanniippoq

Ilinniartut oqalugiarfigineqarnitik naammassigaangata sulerinissaminnut isumassarsiassanik amigaateqarunik taava aktianik niueruteqartartutut misiliisinnaapput.

Danmarkimimi kalaallit ilinniagaqartut peqatigiiffiat, Avalak, Grønlandsbankenimi aktianik unammitsinerani, AktieTipsimi, VIP-mik unammeqataasut akornanniippoq.
Peqatigiiffiup siulersuisuuneri unammeqataasunit 310-nit maanna normu 83-itut inissisimapput.

Inissisimaffillu ingerlatseqatigiiffiit qanoq ineriartornissaannik imaaliallaannaq takunnissinnaannginnermut, aamma ingerlariaqqiffiusuni ulluinnarni ilinniartuugaluaraanniluunniit, assersuutissaavoq.

Avalaap siulittaasua, Bjørk Lange Kristensen, Aarhus Universitetimi inuussutissarsiornermi aningaasaqarnermik, erhvervsøkonomi, ilinniagaqartuuvoq, Nuummilu 1989-imi inunngortuulluni.

Taassuma ilinniarnini aqqutigalugu suliffeqarfik aningaasaliiffissaqqissuunersoq nalilersussallugu ilinniarsimavaa, erseqqissaatigalugulu piginneqataassutit qaffannissaat, apparnissaat taamaaginnarnissaalluuniit eqqoriarsinnaassagaanni iluatsitsineq ilisimasaqarnissarlu pisariaqartut.

- Niuerfik ingerlatseqatigiiffiit pillugit nutaarsiassanut sukkasoorujussuarmik qisuariartarpoq. Taamaattumik ingerlatseqatigiiffik suliaqarfilluunniit pillugu nutaarsiassamik paasisaqaruit sukkalluinnartariaqarputit imaluunniit iluatsitsisariaqarlutit, niuerfiillu sinnerata qisuariannginnerani qisuariarlutit, Bjørk Lange Kristensen nassuiaavoq.

Avalaap saniatigut Arctic Winter Gamesip allattoqarfia VIP-tut aamma peqataavoq.

Aningaasanngorlugit akissarsiasat
Grønlandsbankenip ukiumoortumik aktianik unammisitsinera marsip 2-ani aallartippoq. Aningaaseriviullu ukioq manna inuit ilinniagaqartut aningaasaliissutinik, piginneqataassutit nalinginik, iluanaarutisianik oqariartaatsinillu allanik silarsuarmi tassani atorneqartunik soqutiginnilersinnissaat immikkut pingaartippaa.

Aningaaseriviup ukioq manna akissarsiarititassaanit 25.000 koruuniusunit 17.000 koruunit atuaqatigiinnut ilinniartoqatigiinnulluunniit ingerlalluarnerpaanut akissarsiassat siulliattut, tulliattut pingajuattullu tunniunneqassapput.

Tamatumalu peqatigisaanik pisarneq malillugu unammeqataasut allat angerlarsimaffimminni piginneqataassutinik nalilersuisartut amerlanerpaartarisaat akissarsiassaqartinneqarput. Taakkununnga akissarsiassat siullersaat 5.000 koruuninik, aappaat 2.500 koruuninik pingajuallu 1.000 koruuninik aningaasartaqarput.

AktieTips pisarneq malillugu Sermitsiaq suleqatigalugu ingerlanneqarpoq.

Unammisitsinermut malittarisassat uani takuneqarsinnaapput: www.aktietips.gl.
Unammisitsinermut peqataaneq akeqanngilaq, aningaaserivimmi sullitaaneq sullitaannginnerluunniit apeqqutaatinnagit.

Powered by Labrador CMS