Ilinniartut kinguussaajartortut

Piginneqataassutinik unammisitsineq sikkilinik sukkaniunnermut assingusinnaavoq.

Apuuffissaq taama ungasitsigitillugu aallartilluarsimagaluarluni inissisimaffiup aalajangiusimanissaa ajornakusoorsinnaasarpoq.

Tamanna Grønlandsbankenimi Sermitsiaq.AG-milu ilinniartut paasivaat.
Unammisitsineq marsip 2-ani aallartimmat unammeqatigiit normu 3-tut toqqaannartumik inissipput.

Maannali ilinniartut unammeqataasut 320-t sinneqartoq akornanni appasinnerusumi normu 162-itut inissisimalerput. Ilinniartoqatigiilli sapiissuseeruteqqajarsimanngilla.

- AktieTipsimi qanoq ingerlanersugut aningaaserivimmi suleqatitsinnit aperineqaraangatta akisarpunga, pissutsit maannakkorpiaq ingerlanerluttut, kisiannili piffissap ingerlanerani ilorraap tungaanut aallassaqqaartugut. Ullumikkut normu 162-iugaluarpugut, tamannali pissutigiinnarlugu uniinnarnianngilagut, Grønlandsbankenimi sungiusaammik sulisoq ilinniartullu piginneqataassutinik niueruteqartut akornanniittoq Jacob Munkesø isumalluarpasilluni oqarpoq.

Ilinniartut taakkua AktieTips pillugu ussassaarutiniipput, tamatumalu saniatigut Nuummi, Qaqortumi, Sisimiuni Maniitsumilu ilinniarfinni unammisitsineq pillugu 15-init amerlanerusoriarlutik saqqummiussisimallutik.

- Uatsinnit isigalugu inissisimaffipput unammisitsinermut pikkorilluinnartunik peqataatitsisinnaasimanitsinnut annermik takussutissaavoq. AktieTipsimi ukioq manna pikkorissorpassuaqarpoq, Jacob Munkesø ilassuteqarluni oqarpoq.

Taanna tamatuma saniatigut erseqqissaalluni oqarpoq, ilinniartut suliassamik
pimoorussilluinnartut.

- Unammisitsinermut piginneqataassutinut 13-inut akisussaaffik agguataarsimavarput.

Taakkua pingaartumik børsenimi nutaarsiassanilu malinnaaffigaavut, naliliinivullu
immersugassamut akisussaasumut ualip ingerlanerani nalunaarutigisarlugit, Jacob Munkesø nassuiaavoq.

Aningaasanngorlugit akissarsiassatGrønlandsbankenip ukiumoortumik unammisitsinera aktiespil marsip 2-ani aallartippoq. Aningaaseriviullu ukioq manna ilinniartut aningaasaliinernik, piginneqataassutit nalinginik, iluanaarutisiassanillu – kiisalu silarsuarmi tassani oqariartaatsinik allanik tamanik –
soqutiginnilersinnissaat immikkut pingaartippaa.

Grønlandsbankenip aktiespillet 13-issaannik aaqqissuuppaat. AktieTipsilu pisarneq malillugu Sermitsiaq suleqatigalugu ingerlanneqarpoq.
Tamatuma akerlianik aningaaserivimmi ilinniartut tusagassiorfimmilu ilinniartoq unammisitsinermi piginneqataassutit qanoq ineriartornissaannik eqqoriaasarnerminni suleqatigiipput.

Ajugaasunut tunniunneqartussat
Grønlandsbankenip ukioq manna akissarsiassiissutigisaanit 25.000 koruuniusunit 17.000 koruunit atuaqatigiiaanut ilinniartoqatigiinnulluunniit ingerlalluarnerpaasunut akissarsiassatut siullertut, aappaattut pingajuattullu tunniunneqassapput. Pisarneq malillugu unammeqataasut sinnerinut, piginneqataassutinik nalilersuisartut amerlanerpaartarisaannut, aamma akissarsiassaqarpoq.

Taakkununnga akissarsiassat siullersaat 5.000 koruuninik, tullia 2.500 koruuninik pingajuallut 1.000 koruuninik aningaasartaqarput. Unammisitsinermi malittarisassat takusinnaavatit uani: www.aktietips.gl.

Unammisitsinermut peqataaneq akeqanngilaq, aningaaserivimmi sullitaaneq sullitaannginnerluunniit apeqqutaatinnagit.