ilinniartitaaneq

Ilinniartut: Kinaana paatsiveeruttoq, Nick?

NIuernermik Ilinniarfimmi Nuummi ilinniartut siunissartik pillugu ernumapput naalakkersuisunilu erseqqissumik ilisimatinneqarnissartik piumasaralugu

Nuummi Niuernermik Ilinniarfimmi ilinniartut siunnersuisooqatigiivisa NI1-ip Qaqortumut nuunnissaa akereraat

Niuernermik Ilinniarfimmi ilinniartitaaneq NI1 Nuummiit Qaqortumut nuunneqarniarnerluni? Niuernermik Ilinniarfimmi ilinniartut siunnersuisooqatigiivisa tamanna erseqqissumik akineqaqquaat. Ilinniartut siunnersuisooqatigiivi nuussinissamik eqqarsaammut akerliupput.

Atuaruk: Wæver: Niuernermik Ilinniarfik tamarmi Qaqortumut nuulli

Nuummi Niuernermik Ilinniarfiup Qaqortumut nuunneqarsinnaanera pillugu oqallinneq oktoberi aallartilaartoq aallartippoq Kommune Kujallermi Borgmesteri Jørgen Wæver Johansen Siumumeersoq siunnersuuteqarmat Niuernermik Ilinniarfik Qaqortumut nuunneqaqqullugu.

Ilinniarluarnissamut aqqut
Isumassarsiaq taanna ilinniartitaanermut naalakkersuisumit Nick Nielsenimit Siumeersumit toqqaannartumik akerlilerneqanngilaq erseqqissarluguli suli aalajangertoqanngitsoq. Oqallinnerli Nuummi Niuernermik Ilinniarfimmi ilinniartut eqqissiunnaarutigaat.

Ilinniagaqaqqinnissamut piareersarneq NI1 inuusuttorpassuit aqqusaartarpaat matematikkimi tuluttullu karakterit qaffassarlugit gymnasiani ilinniaqqinnissamut piareersarfittut.

- Imaassinnaavoq NI1 uiarterinerusoq ilinniaqqinnerit eqqarsaatigalugi – kisianni eqqarsaatigeriartigit ukiut qulit aqqanillit kingulliit ingerlaneranni 200-ut sinnillit taanna aqqutigalugu ingerlariaqqissimasut ullumikkut ilinniagaqarsimallutik inuiaqatigiinni atorfigissaartut – NI1-qanngitsuuppat immaqa ilinniagaqarsimanatik sulissagaluarput suliffissarsisimassagunik, Nuummi Niuernermik Ilinniarfimmi ilinniartut siunnersuisooqatigiivi nalunaarput.

Taakku innersuussutigaat politikkerit ilinniagaqaqqusillutik oqaassisarnerat. Maannali siunissartik pillugu nalornipput.

- Kikkut paatsiveeruppat, Niuernermik Ilinniarfimmi ilinniartut imaluunniit ilinniartitaanermut, kulturimut, ilageeqarnermut naligiissitaanermullu naalakkersuisoq Nick Nielsen paatsiveerussimanerpoq?, ilinniartut siunnersuisooqatigiivi aperipput erseqqissumillu naalakkersunit ilisimatinneqarnissaq piumasaralugu.

Powered by Labrador CMS