Ilinniagaqarnersiutit
Ilinniartut atungarissaarnerulissapput
Ilinniartut ulloq 1. august aallarnerfigalugu pitsanngoriaatinik arlalinnik malugisaqassapput. Ilaatigut ilinniagaqarnersiutit siumoortumik akilerneqartalissallutik.
Tamanna pissuteqarpoq, Naalakkersuisut akuersissutigimmassuk ilinniagaqarnersiutit pillugit nalunaarut nutaaq 1. august atortuutilertussaq
Ilinniagaqalertunut ikiuutit
Immikkut malugineqassaaq qaammatikkaartumik ilinniagaqarnersiutit - stipendiat -akilerneqartarnerisa allanngortinneqarneri, kingumoortumik akiliisarnermiit siumoortumik akiliisarnermut. Allannguinerup nutaamik ilinniagaqalertut ikiussavai, misilittakkat naapertorlugit taakkua aningaasaqarnikkut ilinniarnerup qaammataani siullerni ajornakusoortumik inissisimasaraluarmata, naalakkersuisoqarfik tusagassiuutinut nalunaarummi paasissutissiivoq.
- Naalakkersuisooqatigiinnermut isumaqatigiissutikkut aalajangersarsimavarput inuusuttunut atugassarititaasut killiliussat pitsaanerulersinneqassasut, nunatsinni namminermi nunaniluunniit allani ilinniagaqarsinnaaneq eqqarsaatigalugu. Taamaattumik nuannaarutigaara ilinniagaqarnersiuteqarnermut nalunaarut nutaaq maanna atortuulermat - Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq, Doris J. Jensen oqarpoq.
Allannguutit:
- Qaammatikkaartumik siumoortumik ilinniagaqarnersiutit
- Tapiissutit qaffasinnerusut aamma attartornissamut periarfissat ilinniakkamut akitsuummik akiliinissamut
- Ungasissumiittutut ilinniakkamik ingerlatsinermut ilinniagaqarnersiuteqarsin-naanermut periarfissaqalerneq.
- Ilassutitut atuartitaanermut tapiiffigineqarnissamut periarfissaqalernera Kalaallit Nunaata avataani ilinniagaqartunuinnaanngitsoq.
- Akiliunneqarluni angalasarnermut malittarisassat eqaannerulersinneqarput siunnerfilerneqarlutillu
Imminut pilersorneq
- Anguniagaraarput qularnaassallugu nunatsinni innuttaasut ilinniarluarsimasuunissaat taamalu ilinniarluarsimasunik imminut pilersortunngornissarput, ilinniagaqarnersiuteqar-nermullu nalunaarutikkut nutaakkut nukittorsassavarput ilinniagaqartut ilinniakkanik tapiiffigineqarsinnaasunik naammassisaqartarnissaat – Naalakkersuisoq Doris J. Jensen, naggasiilluni oqaaseqarpoq