nunatsinnit
Ilinniartut atuartullu akikinnerusumik misigisassarsiorlutik angalasinnaalerput
Ilinniartunut atuartunullu paasisassarsiorlutik angalanissamut pilersaarusiortunut nuannersumik nutaarsiassaqarpoq
Ilinniartut paasisassarsiorlutik angalanissaannut ajornannginnerulersitsisussamik akikinnerulersitsisussamillu Air Greenland aningaaserivillu Grønlandsbankenilu suleqatigiinnissamik isumaqatigiissuteqarput, suliffeqarfiit tusagassiutinut nalunaaruteqarput.
Ilinniarnermut atatillugu paasisassarsiorluni angalanissamut Grønlandsbankimi aningaasanik ileqqaagaqartunut, Air Greenland Kalaallit Nunaanni atuarfinni ilinniarfinnilu atuartunut ilinniartunullu annertuumik akikillisaavoq.
- Meeqqat inuusuttullu klassimi atuaqatitik peqatigalugit paasisassarsiorsinnaasut amerlanerulernissaannut peqataarusuppugut. Taamaammat Grønlandsbanki suleqatigalugu atuaqatigiiaat ilinniartoqatigiillu siusinaarlutik pilersaarusiortut aningaasanillu ileqqaartut akilerniarlugit suleqatigiilerpugut, Air Greenlandimit Christian Keldsen, neqeroorut ataatsimoorussaq meeqqanut atuartunut inuusuttunullu ilinniartunut tunngasoq pillugu oqarpoq.
Assersuutigalugu Sisimiuniit Københavnimut siumut utimullu akikinnermi 5200 koruuninik akiliilluni angalasoqarsinnaassaaq. Air Greenland-imi akikillisaaneq nunatta iluani, Københavnimut, Keflavik-imut Iqalunnullu angalanernut atuuppoq. Akitigut iluanaaruteqassagaanni Grønlandsbankimi aningaasanik
ileqqaarnermut kontomik pilersitsisimanissaq piumasaqaataavoq.