Qeqqata
Ilinniartut Assaquttamut ikaartarfiliortut
Suliniut ARTEK-imi ilinniarnerannut aallarniutitut ilaavoq
Center for Arktisk Teknologimi, ARTEK-imi, ingeniørinngorniat nunaqarfiup Assaquttap nunavimmut attaveqaatissaanik ikaartarfimmik sananikuupput, Qeqqata Kommunia ilisimatitsivoq.
Assaqutaq Sisimiuniit 8 km-inik ungasitsigisumiippoq, aammalu nunavimmiit 25 meterinik ungasissusilimmi qeqertannguami inissisimavoq.
Tammaarsimaarfik
Assaqutaq atuartut tammaarsimaartarfiattut aammalu umiarsuarnut takornariartaatinut takornariarfissaqqissutut takornarissanullu sivisunerusumik uninngasunit atorneqartarpoq. Ikaartarfik nutaaq Qeqqata Kommuniani sumiiffimmi najugalinnut aammalu takornarissanut Assaquttamut appakaannissamut periarfissiivoq.
ARTEK-imi issittumi ingeniørinngorniat nutaat ukiut tamaasa ilinniarnissaminnik aallartitsisarput, Teknikkimut suliniutinik aallarniuteqartarlutik. Ukioq mannalu ikaartarfiliorneq suliniutigineqarpoq.
Ikaartarfik ukiut pingajussaani ilinniartunit ilusilersorneqarpoq Martin Kotol ilitsersuisoralugu, taanna suliniummut akisussaasuuvoq.
Atuaruk: Issittumi ingeniørit 50-issaat Artek-imit naammasseqqammerpoq