kollegianik sanaartorneq
Ilinniartunut kollegiat 330-t sanaartorneqarniartut
Sanarfinermut Avatangiisinullu Ataatsimiitiliap Nuummi kollegianik nutaanik qulinik sanaartorluni aallartitsisoqarnissaa politikeriniit akueritikkusuppaa.
Ataatsimiititaliap ataasinngornermi ataatsimiinnerani politikkerit siunnersuummut akuersissappata pilersaarutit aningaasaqarnermut ataatsimiitaliamut ingerlateqqinnissapput kingornalu sapaatit-akunneri arfineq pingasuni tusarniuutigineqassalluni.
Sanaartukkat arfineq pingasut isaterneqassasut
Kujallerpaani kollegialiortoqarnissaanut tunngatillugu sanaartugassat ilinniartunut 330-nut inissaqartitsissaaq. Namminersorlutik Oqartussat sanaartukka arfineq pingasut isaterneqarsinnaasut toqqareersimavaat.
- Siunnersuutigineqarpoq, annertunngitsunik immikkoortukkuutaanik arlalinnik illoqarfimmut sanaartoriaatsinullu naleqqussakkanik sanaartortoqassasoq. Illut tamarmik immikkut sisamanik inissiartaqarput pingasunillu quleriiullutik, ataatsimiititaliap politikkerinut suliassamik saqqummiussinerani erserpoq.
Inissiat pioreersunut naleqqussagaanissaat kiisalu ilinniartunut inissianut sanaartorneqartunut kingullernut sisamanut assingusuunissaat, ilanngunneqarpoq.
Ilinniartunut atungassarititat pitsaasut
Ingerlatsiviup ilimagaa ilinniartunut atuartunullu inissianik assingusunik sanaartorneq ilinniartunut atugassarititaasunik pitsanngoriartitsilluarsinnaasoq. Siunnersuummittaaq pingaartinneqarpoq, illut akorngi pitsaasunik aneerfissaqarsinnaanerat, tamannami sammisassanut, meeqqanut pinnguartarfiit, siaasaavissat, fitness il.il. periarfissaqarluartitsissaaq