Ilinniartunut festertunut eqqartoq ukiuni sisamani inissiisarfimmiissasoq

Angut 30-nik ukiulik ullumi tallimanngornermi Aasiaat eqqartuussiviani inunnut arlalinnut juunimi aallaammik eqqarsimasutut ukiuni inissiisarfimmiittussanngorlugu pineqaatissinneqarpoq.

Pisoq sisamanngornermi juunip 30-anni ullaakkut pivoq, tassani ilinniartut festernerat nuannersoq nuannerunnaarsinneqarpoq. Angut unnuami festernermut peqataasimasoq aallaammik illumut festerfiusumut arlaleriarluni eqqarpoq.

Oqqanneq
Angut taanna festertunut arlalinnik oqqateqateqarnerata kingorna tamanna pisimanerarneqarpoq. Tamatumalu kingorna illumit ingerlasimavoqm kisianni aallaaserluni uteriarluni illumut festertut silamiittut tungaannut eqqarsimavoq, tassani 500 meterit missaanni ungasitsigisumiissimavoq.

Kingornalu 60 meterinik ungasissuseqartumit eqqarpoq, kisiannili inunnik eqquinngilaq.

Inuit inuunerannik ulorianartorsiortitsisoq
Angut ilaquttaminit qanigisaminit unitsinneqarpoq, kingornalu politiinit tigusarineqarluni.

Taanna nakuusernermut, sioorasaarinermut, toqutseriarnermut kiisalu allat inuunerannik ulorianartorsiortitsinermut unnerluunneqarpoq.

Pineqaatissiissut naammagigaat
Unnerluussisussaatitaasut angut ukiuni tallimani isertitsivimmiittussanngorlugu piumasaqaateqarput, kisianni eqqartuussiviup ukiuni sisamani pineqaatissiissutaat naammagisimaarpaat.

- Aallaasersornermi iluatsitsinerinnakkut ajoqqusertoqaranilu toqusoqanngilaq. Unnerluutigineqartup inuit arlallit ulorianartorsiortippai. Taamaammat angutip pineqaatissinneqarnera naammagisimaarparput, politikommisæriugallartoq Aasianni Qaasuitsup politiianeersoq, Arne Sandgreen Reimer, allappoq.