Sulisoqarnermik suliat
Ilinniartitsisut suliunnaarsinneqarsimanerat angajoqqaanut isumakulutsitsisoq
Nuummi Nipilersornermik Ilinniarfimmi ilinniartitsisut marluk suliunnaarsinneqarput, taakku ukiuni arlalinni sulisimapput.
Nipilersornermik ilinniartitsisunik pikkorissunik suliunnaarsitsineq "meeqqat saanni" pivoq, tamanna Sermitsiaq.AG-p angajoqqaat ilaannit mailikkut tigusimasaani erserpoq, taanna kinaassutsiminik isertuusserusuppoq, aaqqissuisoqarfimmiilli atia ilisimavarput.
Isumaqatiginninniarnerit
Ilinniartitsisut taakku marluk isumaqatiginninniarfigineqartut, Kommuneqarfik Sermersuumi sunngiffimmi sammisassaqartitsinermut attuumassutilinnut fagchefip uppernarsarpaa.
- Ilinniartitsisut taakkua nipilersornermik ilinniarfimmi ilinniartitsinermut peqataajunnaarsimanerat uppernarsarsinnaavara. Sulisulli ataasiaakkaat pineqarmata itinerusunik paasissutissiisinnaanngilanga, Frederik Lundblad Sermitsiaq.AG-mut oqarpoq.
- Suliaq ingasappoq, soorunalimi ajuusaarnaraarput, fagchefi oqarpoq.
Ilinniartitsisut taakku ilinniarfimmi suleqataajunnaarsimanerat pillugu, sapaatip akunnerata siuliani Kommuneqarfik Sermersuup angajoqqaat nalunaarfigai, sulisulli ataasiakkaat eqqartorneqarmata suna pissutaanersoq angajoqqaanut nassuiaatigineqanngilaq.
Angajoqqaat isumakuluttut
Angajoqqaat arlariit isumakulupput, ilinniarfimmilu qanoq pisoqarumaarnera annilaangassutigaat. Ilinniartitsisut taakku angajoqqaanit pikkorigineqarlutilli nuannarineqarput. Tamanna pillugu taakku sisamangormat kommuneqarfimmut allagaqaasiorput - akineqarsimanatillu.
- Angajoqqaat ullumi akineqassapput, Frederik Lundblad neriorsuivoq.
Sapaatip akunnerata ingerlanerani sulisut ataatsimiissasut
Taassuma paasissutissiaraa, ilinniartitsut akunnermusiallit aqqanillit iinniarfimmut attuumassutillit, sapaatip akunnerani ingerlanerani nipilersornermik ilinniarfimmi aqutsisoq Kenneth Horsbrugh ataatsimeeqatigissagaat.
Ataatsimiinnerup siunertarissavaa, ilinniartitsisut taakku amigaatiginerisa nalaani ilinniarfiup qanoq ililluni ataatsimoorluni ingerlanngeqarsinnaanera.
Ilinniarfiup neqoruutai
Nipilersornermik ilinniarfimmi erinarsorneq, erinarsoqatigiinneq nipilersuutillu assigiinngitsut soorlu saxofoni, guitari, qarlortaat sanimoortariaq, tumerparpaat kiisalu agiallu ilinniartitsissutigineqarnissaannik neqerooruteqarpoq. Ilinniartitsinerit ataasiaakkarilluni imaluunniit eqimattakkaarlugit ingerlanneqartarput.
Ilinniartitsineq akeqanngilaq.