meeqqat atuarfii
Ilinniartitsisut imminut illersornermut pikkorissaanerit piumasariniaraat
Meeqqat atuarfiini kimmaanerit, isummikaanerit annersaasarnerillu naliginnaavallaalersimanerisa kingunerisaanik ilinniartitsisut pisut assigiinngitsut sakkortuuliuutigineqartuni assigiinngitsuni aqutsinissap ilinniarneqarnissaa anguniarlugu, ilinniartitsisut imminut illersorneq pillugu pikkorissartinneqartalernissaat, ilinniartitsisunit piumasarineqarniarpoq.
Ilinniartitsisut kattuffia, IMAK, ullunni arlallinni sinniisui ataatsimeereerlutik naammasseqqammerput, tassanilu amerlanerussuteqartuni isumaqatigiissutigineqarpoq, tulliani akissarsiat isumaqatigiinniassutigineqalerpata qulequtaq ilanngunneqassasoq.
Siulittaasunngortoq
- Atuartut akerleriillutik isummikaatileraangata, ajattaatileraangata, kimmaatileraangata annersaatileraangataluunniit avissaartitsisariaqarnermik kinguneqartartut, ilinniartitsisutut nalaataqarsinnaaneq ilisimanngisaannarparput, IMAK-imi siulittaasunngoqqammertoq Nuummi Nuussuup Atuarfianinngaanneersoq, Birthe Møller Therkildsen oqarpoq.
Taanna isumaqarpoq, pisunut taama ittunut, meeqqat atuarfiini nalaanneqartarnerisa amerlatsikkiartuinnarnerini, ilinniartitsisut sakkussaqarnissaat pingaaruteqartoq.
- Naliginnaasumik imminut illersorneq eqqartorneqanngilaq. Killormuanilli ilisimasariaqarparput pisut ataasiakkaat qanoq pitsaanerpaamik iliuuseqarfigisinnaassallutigit, Birthe Møller Therkildsen Sermitsiaq.AG-mut oqarpoq.
Ajornartorsiut annertusiartortoq
Meeqqat atuarfinni sakkortuuliortarnerisa ajornartorsiutaaleraluttuinnarnera, ilinniartitsisut oqaatigaat.
Ilinniartitsisut illersornermut pikkorissaanerit suliniutiminnut ilanngussimavaat, upernaamullu ilinniartitsut akissarsiaat isumaqatiginninniassutigineqalerpat tamanna sulisitsisuisa eqqartussavaat. Akissarsianut isumaqatigiissut massakkut atuuttoq ulloq 31. marts 2018, ilinniartitsisut siulittaasortaavat oqarpoq.