Ilinniartitsut ulluat
Ilinniartitsisut angajoqqaanit iluatatsinneqartut
Ullumi ulloq nunarsuaq tamakkerlugu ilinniartitsisut ulloritinneqarpoq. Tamanna Den Internationale Friskolemi Nuummiittumi ilinniartitsisut ullaakkut suliartornermini angajoqqaat ilaasa aaqqissuussimasaannik mamarinarluinnartunik ullaakkorsiortinneqarput.
Friskolemittaaq plakatiaqqanik ilinniartitsisunut annertuumik suliaqarnerat qujassuteqarfiginiarlugit nivinngartuisoqarsimavoq.
Politikkikkut pilluaqqusineq
Ilinniartitsisulli ataqqiniarlugit politikkikkut pilluaqquneqarnissaat aamma pissusissamisoortoq, IA-minngaanneersut Mimi Karlsen aamma Debora Kleistip tusagassiuunut nalunaarutaanni erserpoq.
- Ilinniartitsisut inuiaqatigiinni suliaq imaannanngitsoq suliarimmassuk qujaffigalugit nersorlugillu pilluaqquagut. Ilinniartitsisut inuiaqatigiinni sunniuteqarnersi pingaaruteqartoq ullumikkut nunarsuatsinni malunnartinniarneqartoq pissusissamisoorpoq, Mimi Karlsen aamma Debora Kleist allapput.
Ilinniartitsisut amerlineqassasut
Ilinniartitsisut atugassarititaat oqilisaaffigineqarlutillu atuarfiit ataasiakkaani ilinniatitsisut amerlineqarnissaat, taakku kissaatigaat.
- Ilinniartitsisut sulilluarnissinnut qujalluta ullorsiorluarnissassinnik kissaappassi, pilluaqqullusilu., politikkerit nalunaaruteqarput.