sipaarniarneq
Ilinniartitaaneq aamma peqqissuseq sipaarniarnermi eqqorneqannginnerpaassapput
Aningaasaqarnermut naalakkersuisup 50 million koruunit tungaanut sipaarutissat nassaarai. Aningaasartuuteqaleriartuinnarneq pissutaalluni immikkoortortaqarfiit marluk eqqorneqarpallaassanngillat
- Iluarisimaarluinnarpara Naalakkersuisut tamarmik sipaarutissatut pisariaqartinneqartunik nassaarniarlutik piumassuseqarnertik takutimassuk, taamaalillutta anguniakkavut angusinnaanngorpavut.
Aningaasaqarnermut naalakkersuisoq Anda Uldum, Demokraatit, oqarpoq.
Naalakkersuisunit anguniarneqarpoq Aningaasanut inatsisip aappassaanneerlugu suliarineqannginnerani 2015-imut Aningaasanut inatsimmi sipaarutaasinnaasunik ukiumut 50 millioner koruuninik nassaarnissaq.
- Suliassaqarfiit tamarmik sipaaruteqassapput. Naalakkersuisut ataasiakkaat oqartussaaffimminni qanoq siparuteqartiginissaat pillugu isumaqatigiissuteqarnikkut agguaasseriaasissaq suliarineqarpoq. Tassunga atatillugu ilinniartitaanermut peqqissutsimullu tunngasuni suliassaqarfiit suliassaqarfinnit allanit annikinnerusunik sipaaruteqassapput, tassa taakku kiffartuussinissamik ujartuineq annertusiartortillugu aningaasartuuteqarneruleriartoramik, Anda Uldum tusagassiutinut nalunaarummi nassuiaavoq.
Sipaarniarfigineqartut arlaqartut
Nangillunilu:
- Sulinitsinni aallaavigisimavagut sipaarutissat naapertuuttuunissaat mianersuussinissarlu. Tamanna iluatsilluartoq isumaqarpunga. Sipaarutissarpassuit millioner koruuniusut konto pingaarnernut 80-ingajalluinnarnut siammarterneqarput. Tamatumuuna takutinneqarpoq, konto pingaarnerit amerlasuut annikitsuarakkuutaanik tapersiissuteqartut, taamaalilluni inunnik isumaginninnikkut oqimaaqatigiissitsiniarneq allanngortinneqanngilaq.
Sapaatip akunnerata tulliata aallartinnerani Aningaasaqarnermut Naalakkersuisup partiit aningaasaqarnermut tunngatillugu oqaaseqartartui qaaqquniarpai 2015-imut aningaasanut inatsisissatut siunnersuutip pingajussaaneerlugu suliarineqarnissaanut isumaqatiginninniarnerit ingerlateqqinniarlugit.