ilinniarnertuunngorniarfik
Ilinniarnertuunngorniat ilisimatusarfinnut ingerlaqqinniartut
Ilinniarnertuunngorluni nasartaarnissaq GUX Aasianni 3.G-nut kisiat takorluugaanngilaq. Taakkumi ilinniaqqinnissartik takorloorpaat, tassa Nuummut, Sverigemut imaluunniit Danmarkimut.
Atuartut ilinniarnermi nukittuut ''universitetsklassemik'' taasami atuarnissamut periarfissinneqarsimapput.
GUX Aasiaat atuartunut ilinniarnikkut nukittunerusunut unammillernarnerusumik pilersitsiniarluni klassi pilersippaa. ''Universitetsklassip'' aamma angalanerit pilersinneqarnerat, atuartut amerlanerusut ilinniarnertuunngortut ilinniaqqinnissamut qinnuteqarnissaannut periusissiamut ilaavoq.
- Atuartut Nuummukartussart ilaatigut Ilisimatusarfimmtu pulaassapput, tassanilu ilinniarnermut peqataasinnaapput, taamalillutik ilinniaqqissagunik qanoq naatsorsuuteqarsinnaanerlutik misilissinnaassagamikku, Anton Smedegaard GUX Aasianneersoq ilisimatitsivoq.
Københavnimut aamma Lundimut tikeraarneq
Atuartut Danmarkimut aamma Sverigemut angalasussat Københavnimi ilinniarnertuunngorniarfik pulaarlugu aallartissapput, tassani qallunaat ilinniarnertuunngorniartut saqqummiiffigissavaat, avannaanilu ilinniarnertuunngorniarluni inuuneq oqaluttuarissavaat.
Ullup ingerlanerani Kalaallit Illuutaannut pulaassapput, tassanilu atuartut Nunatsinni ilinniarnertuunngorniareerluni Danmarkimi ilinniaqqinniaraanni unammilligassat suusinnaanersut paasisaqarfigissavaat. Tassani ilinniartoq Københavns Universitetimeersoq naapissavaat.
Angalanerup sinnerani ilinniaqqiffiit assigiinngitsut pulaaqattaassavaat. Københavnimi aamma Aarhusimi universitetit saniatigut aamma atuartut Sverigeliassapput, tassanilu Lundimi universiteti pulaassavaat. Lundimut tikeraarneq angalanermi pingaaruteqarpoq, tassami ilinniaqqinniaraanni Danmarkimut killeqannginnera takutinnissaa kissaatigineqarmat.
Atuartut angalanermut sunniuteqarsimapput, taammaattumillu Lund Universitetimi inatsisilerituunngorniarnermit, nipilersornermik ilinniarfimmi Rytmisk Musikkonservatoriumimut, Aarhus Universitetimi psykologi aamma Danmarks Tekniske Universitetimi ingeniøritut ilinniarneq paasisaqarfigissavaat.
Rektori tulluusimaartoq
Rektorip Otto Simonsenip suliniutip aallartinneqarsinnaanera tulluusimaarutigaa isumalluarfigalugulu-
- Angalaneq atuartut ilaannut ilinniaqqinniarluni ingerlaqqinnissamut nalornissutaasinnaasunut paasisaqarfiunissaa ilimagilluinnarparput, Otto Simonsen Sermitsiaq.AG-mut oqarpoq.
Aningaasaateqarfiup Napap suliniut tapersersimammagu nuannaarutigaa, taamaalilluni periarfissaqartoqalerpoq, taamatut angalanerit GUX Aasianni ileqquulernissaat taassuma neriuutigaa.