ilinniartitaaneq
Ilinniarfissuarmi ilinniartitsisutut 40-ut naammassilerput
Ilinniartitsisunngortartut ukiuni aggersuni aalaakkaassapput
Ilinniarfissuarmi tallimanngornermi nalliuttorsiortoqassaaq ilinniartitsisunngorlaat 40-ut ilinniarsimanermut uppernarsaataat agguaanneqassammata. Naammassisut siornamut sanilliullugu amerlanerupput ilinniartitsinngorniarnissarlu soqutigineqarluarpoq.
Atuaruk: Ilinniartitsisut nutaat 31-it allagartartaarput
Siunertalimmik bacheloritut ilinniarneq ukiunik sisamanik sivisussuseqartoq naammassissavaat ilinniartullu ilaat inaarutaasumik sisamanngornermi misilitsipput. Ilinniartut ilaat ukiut sisamat affarlu ilinniarsimapput taakkunannga ukiut pingasut affarlu nammineq illoqarfigisami atuarsimallutik.
Ilaat uniinnartarput
- Naammassisartut amerlassusaat nikerarsimavoq siornalu naammassisut 31-ugamik pisarnermit ikinnerulaarput. Maanna 40-ut tallimanngornermi naammassisussanngorput ukiunilu aggersuni naammassisartut tamatuma missaanik amerlassuseqartassapput, ilinniarnermik ilisimatusarfimmi pisortaq Dorthe Kornelissen Sermitsiaq.AG-mut oqarpoq.
Ilinniartitsisunngoriarlutik aallartittartut amerlassusaat aalaakkaasuuvoq ukiumut ilinniartut nutaat 60-it aallartittarlutik.
- Taakkuli ilaat ilinniarnerup ingerlanerani unikkallartarput kingusinnerusukkut naammassillutik. Aamma ilaat uniinnartarput. Taamaammat ukiut tulliit naammassisartut 40-ut missaanniinnissaat ilimanarpoq, Dorthe Kornelissen oqarpoq.
Naammassisut aqqi assillu Sermitsiaq.AG-mi tallimanngornermi saqqummiunneqarumaarput.