Ilinniarfimmi pisortaq: Ilinniartunngortnissamut piumasaqaatit attornagit
Piumasaqaatit sukanganerusut aamma ilinniartitsisunngorlaat amerlanerulernerat ingiaqatigiissinnaapput, Ilinniarfissuarmit tamanna oqaatigineqarpoq.
IMAK aamma Sulisitsisut qisuariarnerisa kingorna, Ilinniarfissuarmi ilinniartunngornissamut piumasaqaatit sakkukillineqarnissaannut apeqqummut Ilinniarfissuup pisortaa, Britta Lohmann, maanna aamma qisuariaateqarpoq. Kattuffiillu taakku marluk assigalugit isumassarsiaq isumaqatiginngilaa.
Ilinniartitsisunik amigaateqalersinnaaneq, ilinniartunngornissamut piumasaqaatit sakkukillinerisigut akiorniarneqarnissaa, Doris J. Jensenip (S) qineqqusaarluni oqallinnermi siunnersuutigaa. Ilinniarfiup pitsaassusaa ajorseriartinnagu tamanna pisinnaasoq, taanna isumaqarpoq.
Kisianni tamanna Britta Lohmannip ilalinngilaa.
- Ilinniartunngornissamut piumasaqaatit sakkukilligaanni, taava aamma ilinniarnerup pitsaassusaa eqqorneqassaaq. Taakku marluk immikkoortinneqarsinnaanngillat, ilinniarfiup pisortaa Sermitsiaq.AG-mut taama oqarpoq.
Ilinniagaq pilerinarnerusoq
Ilinniartunngornissamut piumasaqaatit siorna sukaterneqarput. Ilinniarfimmi piginnaasatigut naliliilluni nalunaarusiami isornartorsiusoqarneranut atatillugu tamanna pivoq.
Illuanik ilinniarfiup pitsaassusaa qaffaatigalugu ilinniartitsisut amerlanerusut ilinniarsimalersinneqarsinnaasut Britta Lohmannip upperaa. Taakku imminnut nusussinnaasut taassuma nalilerpaa.
- Ilinniartitsisunngorniarluni ilinniarneq nutaaq aggustimi aallartissavarput, tassani ilinniartut nutaamik suleqatigiissapput. Tamanna amerlanerusut – aamma qaffasissumik karakterillit – qinnuteqarnerusalernissaannik kinguneqarsinnaavoq.
Amerlanerit naammassisalissapput
Ilinniarnerup nutaaq aamma Britta Lohmannip naliliinera naapertorlugu, ilinniartitsisut amerlanerusut ilinniarsimalernissaannik kinguneqartitsisinnaasoq isumaqarpoq, tassa amerlanerusut naammassisalernerisigut.
- Suliat akimorlugit suleqatigiinnerit aamma eqimattakkaarluni suleqatigiinnerit ukkatarineqarnerunerisigut ilinniartut imminnut susassareqatigiinnerulersittarpaat. Atuariartornissamut pisussaaffeqarnerulluni misiginermik tamanna kinguneqassaaq.
Tamatuma saniatigut ilinniartitsineq soqutiginarnerulissaaq.
Ilinniakkami nutaami piumaqaatit sukateriffigineqarnerinut ilinniartitsisunngortussat suliassaminnut piareersimanissaat pingaarnertut tunuliaqutigineqarpoq. Kisianni tamatuma saniatigut aamma amerlanerusut ilinniarsimalernissaannik kinguneqarsinnaavoq.
- Piumasaqaatit sukaterneqarnerat ilinniartitsisutut ilinniarnerup ataqqinnartunngoqqinneranik aamma kinguneqarsinnaavoq. Amerlanerusut qinnuteqartalernerannik kinguneqarsinnaalluni, Britta Lohmann naliliivoq.