Ilinniarfik nutaaq: DTU aalisarnermi teknologinik Sismiuni ilinniartitsiniarpoq

Ilinniakkami nutaamik DTU aamma Namminersorlutik Oqartussat nunatsinni inuussutissarsiornikkut ineriartornerup nukittorsaqqinneqarnissaa neriuutigaat. Sisimiuni misilittakkat pitsaangaarmata ilinniarfinnik nutaanik marlunnik ukiuni aggersuni pilersitsisoqarniarpoq.

Ilinniagaq uunga tunngavoq

Aalisarnermi teknologitut ilinniarnermut sinaakkutit DTU-p aalajangersaleruttorpai, taakku sulianut sisamanut tunngasuussapput: biologi/oceanbografi, aalisarnermi teknolgi, aalisakkanik qalerualinnillu aqutsineq aamma pitsanngorsaaneq. Aammattaaq pilersitsinermik aallarnisaanermillu ukkatarinnittoqassaaq.

- Kalaallit Nunaata aamma Issittup sinnerata imartaani pisuussutit inuussutissarsiutinut periarfissarpassuaqartitsipput, suliffissaqarnerulersitsinermut aamma aalisakkat pitsanngorsarlugit suliareqqinnissaanut aaqqiissuteqarnissamut pilersitsinermut tunngatillugu. DTU-p aamma Namminersorlutik Oqartussat akornanni aalisarnermut teknologitut Kalaallit Nunaanni ilinniarfimmik suleqatigiinneq, Arktisk Teknologimi diplomitut ilinniakkamik suleqatigiinnitta pitsaasup tulluartumik nanginneriinnassavaa, Nina Qvistgaard DTU Aquameersoq oqarpoq, taanna ilinniarfiup nutaap ineriartortinneqarnissaanut akisussaasuuvoq.

Danmarkimi pikkorissarnerit

Arktisk Teknologimi ilinniarfiup tunngavii assigalugit ilinniagaq pilersinneqassaaq, ilinniartut tassani ukioq ataaseq affarlu Sisimiuni ilinniarnermik aallartittassapput. Tamatuma kingorna ukioq ataaseq Danmarkimi ilinniaqqissapput, tassani DTU-p ilinniarfiani Lyngbymi, Ballerupimi imaluunniit Hirthalsimi pikkorissartassallutik. Ilinniakkap sinneranik ukioq ataaseq affarlu suliffimmik misiliinermut, pikkorissarnernut nammineq toqqakkanut aamma inaarutaasumik suliniuteqarnermut atorneqartassaaq.

- Ukiup ataatsip affaanilu kingullermi Kalaallit Nunaanniinnissaq periarfissaassaaq, Nina Qvistgaard oqarpoq.

Inuilip procesteknologitut ilinniarfianut attuumassuteqartoqassanngilaq. Ilinniakkat taakku suliatigut aamma qaffasissutsikkut assigiinngitsorujussuupput, aalisarnermi teknologitut ilinniakkap ineriartortinneqarnera Inuilip oqaloqatigineratigut pissaaq, ilaatigut kandidatitut ilinniaqqinnissamut periarfissamik pilersitsiniarluni.

Aalisarnermi teknologitut diplomingeniøritut ilinniarneq Pinngortitaleriffik aamma Ilisimatusarfik suleqatigalugit aaqqissuunneqassaaq, aammalu kalaallit aalisarnikkut inuussutissarsiortui qanimut oqaloqatigineqarnerisigut.

Ukioq 2020-mi DTU-p aatsitassarsiornikkut diplomingeniøritut ilinniakkamik neqerooruteqalereernissani naatsorsuutigaa.