Ilinniarneq
Ilinniarfiit nuunneqarnissaannut pilersaarut nanginneqarpoq
Ilinniarfiit sisamat nuunneqarnissaat Naalakkersuisut pilersaarutigaat
Nuussinissanut siunnersuutit sisamaasut tassaasimapput Saviminilerinermik Ilinniarfiup Sisimiunut nuunneqarsinnaanera, Niuernermik Ilinniarfiup (NI-Nuuk) Qaqortumut nuunneqarsinnaanera, Isumaginninnermi siunnersortitut ilinniartitaanerup Ilulissanut nuunneqarsinnaanera aammalu Eqqumiitsuliornermik Ilinniarfiup Aasiannut nuunneqarsinnaanera.
- Naalakkersuisut ilinniartitaanerni nuunneqartussani ineriartortitsinissamut periarfissat takusinnaavaat, ilinniartitaanermut naalakkersuisoq Doris J. Jensen tusagassiuutinut nalunaarummi oqarpoq.
Naalakkersuisut siorna aalajangerput ilinniarfinnik illoqarfinnut allanut Nuup avataaniittunut nuussinissat Naalakkersuisut anguniagaanni qitiusumik inissisimasut.
- Tamatumani siunertaavoq nukinnik aamma periarfissanik nunatsinni sumiiffinni assigiinngitsuniittunik iluaquteqarnissat, ilutigisaanillu ineriartortitsinermik suliffissanillu pilersitsisarnissat. Anguniagaq taanna anguneqarsinnaaqqullugu 2017-imi aallartinneqarput suliniutit arlallit, qulaajarumallugu ingerlatsiviit suut iluaqusiisumik allanut nuunneqarsinnaanersut, tusagassiuutinut nalunaarummi ilisimatitsissutigineqarpoq.
Siullermik iliuutsini nuussinissamut siunnersuutit sisamat nalilersuiffigineqarput uuttuutit assigiinngitsut atorlugit, tamatumani aamma aningaasarsiornermut aamma sulisussaqarniarnikkut nuussinerup kingunerisassai.
Tunngavilersorluagaasumillu aalajangiinissamut tunngavissat suliarineqarsimasut aallaavigalugit Naalakkersuisut maanna aalajangerput suliat ingerlatseqqinneqassasut, Saviminilerinermik Ilinniarfiup Sisimiunut nuunneqarnissaanik suliamik allaaserinninneq aamma Eqqumiitsuliornermik Ilinniarfiup Aasiannut nuunneqarnissaanik allaaserinninneq suliaralugit. Tamatuma saniatigut kissaataavoq niuernermi ilinniartitaanerit ineriartorteqqinneqarnissaat, assersuutigalugu IT-mik ilinniartitsineq Campus Kujallermi.
- Uanga tunginniit piumasaqaataasimavoq nuussineq ilinniarfimmut iluaqusiisinnaassasoq, maannalu naliliisoqarsimalerpoq aningaasarsiornikkut aamma ilikkagassat tungaasigut ilinniakkanik pineqartunik nuussinissat iluaqutissartaqartut. Taamaattumik qilanaaraakka sunniutaasussaajumaartut takunissaat, ilinniarfinnik taakkuninnga nuussinerit ilinniartitaanerni kinguneriumaagaat, ilutigisaanillu kommunit qutsavigiumavakka suleqatigiinnermut pitsaasumut, Doris J. Jensen oqarpoq.