angusarissaarneq

Ilinniagartuunngortut aatsaat taama amerlatigisut

Nuummi Niuernermik Ilinniarfimmi 2011-mi atualertut 28-t ilinniarnertik aallartippaat. Ukiut marluk ilinniagaqareerlutik aallartittunit 22-t ilinniakkaminnik naammassisaqarput. Atuarfiup oqaluttuarisaanerani aamma taama angusarissaartigisoqarpoq

Niuernermik ilinniarfimmi ilinniakkaminnik naammassinnittut, qulaani saamerlermit: Qillaq Hansen, Uvdloriak Sandgreen, Nuka Skifte, Bent Friis-Salling, Isak Lyberth, Kunûnguak´ E. Kristensen aamma Ilannguaq F. Høy. (Arnani saamerlermit) Naasunnguaq L. Mølgaard, Mariane Pedersen, Randi V. Evaldsen, Paninnguaq Davidsen, Jensine Lassen, Aviana Eriksen, Arnaruluk S. Eriksen, Kulunguak´G. Pedersen, Panissaaq Poulsen, Viola Christoffersen, Naasu T. Olsen, Nina E. Nathansen, Sara Kristensen kiisalu Thea B. Moelgaard

Niuernermik Ilinniarfik Nuuk

aaqqissuisoqarfik

ataasinng 22. juu 2015 16:55

Annonce

Inuusuttorpassuit ukiut tamaasa ilinniakkamik aallartitsisarput, aallartittulli tamarmik ilinniakkatik naammassineq ajorpaat. Tamaanna inuiaqatigiinni ajornartorsiutaavoq.

Randi Vestergaard Evaldsen tusagassiutinut nalunaarummi allappoq.

Niuernermik Iliniarfimmi Nuummiittumi nalinginnaangitsumik pisoqarpoq. Atuaqatigiit 82 procentii ilinniakkaminnik naammassinnipput - aatsaallu taama angusarissaarluartigisoqarpoq. Tassunga pissutaavoq ataqatigiilluarneq, akisussaaffimmik tigusineq suleqatigiinnerlu, atuartut allapput.

- Atuaqatigiinnikkut inuttullu immitsinnut ataqatigiilluartorujussuuvugut aallartinnitsinninngaanniit. Naak ukioqatigiikkaanngikkaluarluta immitsinnut sungiulluartorujussuuvugut, ilinniakkaminik naammassinnittoq, Inatsisartunilu ilaasortaasoq Randi Vestergaard Evaldsen oqaluttuarpoq.

Angusarissaarluartut
- Tapersersuilluartunik ilinniartitsisoqarpugut siunnersuillaqqissunik. Ilinniartut ataatsimut ingerlaqatigiisinniarlugit ilinniakkaminnik aallussilluartut atuaqatiminnut ikiuisarput. Tamanna ataqatigiilluarnitsinnut pissutaaqataavoq, Randi Vestergaard Evaldsen oqarpoq.

Atuaqatigiillutik angusarissaarluarnertik tulluusimaarutigaat.

Maligassiuerusunneq
- Ilinniarnitta nalaani misilitseqattaarnitsinnilu immitsinnut tapersersoqatigiippugut. Misilitsinnissat tungaannut suleqatigiippugut, sivisuumik atuarfimmiissinnaasarluta, Randi Vestergaard Evaldsen oqarpoq.

Atuaqatigiit ilinniakkaminnik naammassinnereeramik suliffeqarfinni sulilertussanngorput.

- Ilinniagaqalertussanut maligassuerusuppugut. Ilinniagaqarnerup nalaani kaammattoqatigiittarnerput takutikkusupparput. Ilinniagaqarnerup tungaatigut qaffassaaqataarusuppugut, tamannami Nunatsinni atorfissaqartinneqarpoq, Inatsisartuni ilaasortaasoq ilinniakkaminillu naammassinneqqammersoq Randi Vestergaard Evaldsen oqarpoq.

nunatsinnit inuiagatigiit