nersornaasiineq
Ilinniagaqartoq Jonathan Prisenimik nersornaaserneqartoq
Civilingeniøritut ilinniagaqartoq 50.000 koruuninik tunineqarpoq, bacheloritut suliniummik pitsaanerpaamik sanasimasutut inassutigineqareerluni
Danmarks Tekniske Universitetimi (DTU) civilingeniøritut ilinniagaqartoq Thomas Ravnshøj Johansen Jonathan Prisen 2015-imik, 50.000 koruuninik aningaasartalimmik nersornaaserneqarpoq.
Nersornaat pilersinneqarsimavoq Kalaallit Nunaanni politikerimut malunnaateqarnerpaamut, Jonathan Motzfeldtimut, 2010-mi toqusumut, eqqaaniutitut.
Inassutigineqartoq
Thomas Ravnshøj Johansen, Ilulissaneersoq, nersornaaserneqaerpoq ´International Symposium on Advances in Refrigeration and Heat pump Tchnology´-mi, novembarip 19-ianni Odensemi ingerlanneqartumi, ´bacheloritut suliniummik pitsaanerpaamik sanasimasutut´ taamatut nersornaasigassatut inassutigineqarnermi kingorna.
Pumpi kiassaat
Thomas Ravnshøj Johansenip suliniutaa tassaasimavoq pumpi kiassaat, Issittumi illunik illulianillu anginerusunik kiassaasinnaasussaq. Suliniut DTU-mi annertunerusumik misissuinerup ilagaa, tassani ilaatigut Norge, Island Savalimmiullu Issittumi illunik kiassaariaatsinik nutaanik ineriartortitsiniarlutik.
Thomas Ravnshøj Johansenip pumpiisa kiassaatit ilaat nunatsinni inoqutigiinni ataasiakkaani ikkussorneqareersimapput.
Nersornaat pisassaraa
– Pumpinik kiassaatinik suliniutaa ima soqutigineqartigisimavoq Odensemi symposiamut atatillugu ukiumi suliniutit pitsaanersaattut inassutigineqarluni. Thomas Ravnshøj Johansen kalaallisut ilinniagaqartutut immikkut illuinnartumik angusaqarsimavoq, aningaasaateqarfimmilu ´Jonathan Prisen´-imi siulersuisut isumaqatigiissutigaat kajumissaammik nersornaaserneqassasoq, aningaasaateqarfiup siulersuisui tunngavilersuipput.
– Kalaallit Nunaata ilinniagaqartitsineq, ilisimatusarneq nunanillu tamalaanik suleqateqarneq aqqutigalugit piginnaasalinnik pikkorissunillu ineriartortitsinissaq tamakkualu nunamut iluaqutaanissaat atorfissaqartippaa. Suliatigut piginnaasaqarluartunik pilersitsinissaq atorfissaqartipparput, inuiaqatigiinnut ilisimasanik ilisimatusarnermillu pilersitsiinnanngitsunik, aammattaarli inunnik allanik sulialinnik piginnaasalinnillu, issittumi silarsuatsinnik soqutigisalinnik, pilerinnilersitsisinnaasunik, siulersuisut erseqqissaapput.
Kajumissaat
Jonathan Motzfeldt Fondip siulersuisui 2015-imi februaarip26-anni ataatsimiinnerminni ´Jonathan Prisen´ pilersippaat. Nersornaat ukiut tamaasa tunniunneqartassaaq, pingaartumik inuusuttunut immikkut illuinnartumik suliniuteqarsimasunut, imaluunniit nalissaqanngilluinnartumik piginnaasalinnut piukkunnaatilinnulluunniit.
Nersornaat, Jonathan Motzfeldt Fondip pilersinneqarnerani Juuntaap nammineq oqarneratut, tigusisumut kajumissaataassaaq.
Ilinniagaqarneq
Aningaasaateqarfiup siulersuisuisa 2015-imi samminiarsimavaat ilinniagaqarneq, nutaaliorneq, aallartitsineq, inuussutissarsiutinik siuarsaaneq, nunatsinni inuiaqatigiinni ineriartornermut immikkoortutut pingaarutilittut.
Jonathan Motzfreldt Fondimi siulersuisunut ilaasortaapput Karen Motzfeldt (siulittaasoq), Lars Vesterbirk (siulittaasup tullia) kiisalu Claus Motzfeldt.
Aningaasaateqarfiup siunnersortigaa eqqartuussissuserisoq Bruno Månsson, Paragraf Plus Advokater, København.