Ilimmarfimmi suliffeqarfinnik nittarsaassineq siulleq
Ilinniartut kattuffiata Ili Ilip Ilisimatusarfik suleqatigalugu tamanna aaqqiissuupaa
Ilimmarfimmi siullermeerluni suliffeqarfinnik nittarsaassisoqassaaq.
Ilinniartut kattuffiata Ili Ilip, Ilisimatusarfik suleqatigalugu suliffeqarfinnik nittarsaassineq aaqqissuuppaa. Tamanna tallimanngornermi 13. april 2018 nal. 12-16 pissaaq.
Ilimmarfimmi siullermeertumik suliffeqarfinnik nittarsaassinermik aaqqissuisoqarpoq, eqqarsaataallunilu aaqqissuussineq Nuummi ataavartumik ingerlanneqartalissasoq.
Suliffeqarfiit 22-it nittarsaassinermi peqataassapput, ilaatigut Air Greenland, Namminersorlutik Oqartussat, Tele-Post Greenland, Kommuneqarfik Sermersooq aammalu Grønlandsbanken peqataatitaqassallutik.
Nittarsaassinerup siunertaraa ilinniartut suliffeqarfiillu imminnut attaveqaqatigiillualernissaat, tassanilu suliffeqarfiit praktikkernermut periarfissat, ilinniartutut ikiortitut suliffeqarsinnaaneq, ilinniakkamik naammassinnilertunut suliffinnik periarfissat kiisalu ilinniarnermut atatillugu suliaqarsinnaanermut suleqatigiittoqarsinnaanerannut nittarsaassisinnaallutik.
Ilisimatusarfimmi Niuernermilu Ilinniartut suliffeqarfinnik nittarsaassinermut qaaqqusaapput, nittarsaassineq pitinnagulu marlunngorneq aprilip 10-ani Ili Ilip ilinniartut suliffissarsiornermut CV-liornermullu workshop-pimik aaqqissuillutik.
Ili Ilip siulersuisuniik nittarsaassinerup ingerlanneqarnissaa qilanaarineqarpoq, aaqqissuussinerlu ingerlalluarumaartoq neriuutigaat.