foredrag
Ilimmarfimmi oqaatsit ilitsoqqussat inuiaqatigiissutsimillu pingaartitsineq
Pingasunngorpat unnukkut Nuummi Ilisimatusarfimmi tamanut ammasumik oqalugiartoqassaaq
Inuiaqatigiissutsimik pingaartitsilluni suliniaqatigiiffinni naalagaaffimmillu namminersortumik ineriartortitsinermi oqaatsit qanoq pingaaruteqartigaat? Takorloorneqarsinnaava naalagaaffik namminersortoq ataatsimut oqaatsinik atuiffiunngitsoq - taamaallaalli ataqatigiissoq ataatsimut kulturimik ataatsimullu politikkikkut naleqartitanik?
Apeqqutit tamakkua - aamma maani Nunatsinni - maanna sammineqarluinnartut unnugu oqalugiartussap sammissavai.
Benedikte Brincker, ulluni makkunani Nunatsinnut tikeraartoq, ulluinnarnilu Departement of Business and Politics-imi, CBS, sulisoq, ukiut ingerlaneranni oqaatsit, nunap naalagaaffiullu akornanni pissutsit pissanganartut pillugit arlaleriarluni ilisimatuutut allaaserinnittarsimavoq.
Ph.d.-mi soraarummeerummini sammisimavai Europami naalagaaffiit pilersiortornerat.
Pingasunngorpat unnukkut Nuummi Ilimmarfimmi tamanut ammasumik oqalugiarnissamut kikkut tamarmik tikilluaqquneqarput. Oqaliugiarneq aallartissaaq nalunaaqutaq 19.30.