udvikling
Ilimanaq siunissami nunaqarssuanngortussaq
World of Greenland, Realdania Byg aamma Qaasuitsup Kommunia Ilimanami issip aputillu ataanni takornarianut illuaqqanik 15-inik neriniartarfimmillu sanaartuleruttorput
Ilimanami aalisartut piniartullu nunaqarfinnguanni Ilulissaniit 15 kilometerit missaannik kujasinnerusumiittumi inuit 54-iinnaat najugaqarput.
Pilersuisup pisiniarfiata eqqaani talittarfeeqqamut niugaanni inussiassaqanngingajalluinnartarpoq. Innuttaasulli marlussuit eqqissillutik illut mikisut akornanni saqerusaarnerat umiatsiaraarsortullu nunaqarfiup saannguani ningittakkanik amuarnerat paasinarsiartuaassaaq.
Sanaartorneq
Qimuttorpassuit nunaqarfimmi sumiiffinni assigiinngitsuni pitussimasut miaggoorpaluttarnerisa saniatigut nipaappoq eqqissisimanarlunilu.
Kisianni Danmarkimi aningaasaliisarfik Realdania Byg Ilulissani takornariartitsinermik suliffeqarfik World of Greenland aamma Qaasuitsup Kommunia suleqatigalugit nunarsuarmi kommunit annersaanni nunaqarfimmi suliniutit annersaannik siornali aallartitaqareersullu avatangiisit nipaatsut eqqissisimanartullu ukioq manna ulapaarnermit sanaartornermillu taarserneqarsimapput.
Nunaqarfik nutaaliaq
Tassami takornariaqarnermik ingerlatsisut taaneqartut attuumassuteqartullu tamarmik aamma Qaasuitsup Kommunia isumaqatigiipput Ilimanami takornariaqarnikkut inuussutissarsiornermi periarfissarujussuaqartoq.
Suliniut, suliani taama ittuni akisunerpaasoq, 35 aamma 40 millioner koruunit akornanni akeqassaaq, tamatumanilu KGH-p illuutitoqai marluk neriniartarfiliaralugit, pisiniarfiliaralugit ataatsimiittarfiliaralugillu annertuumik nutarterneqalersimallutik, kiisalu takornarianut illuaqqanik nutaanik nutaaliaasunillu 15-inik sanaartortoqalersimalluni, soorluttaaq umiarsualivik annertusaavigineqassasoq.
Allaaserisaq tamaat atuaruk, Qaasuitsup Kommunianilu pisut annertuut annikitsullu takullugit. Tamanut Avannaani uani akeqanngitsumik aasinnaavat: