Arsarluni GM
Iligiit uku semifinalimut piareerput
Isikkammik arsarluni pissartanngorniunnerni unamminerit aallarniutaasut naammassineqarput
Unamminerit aalajangiisussat aqagu tallimanngornermi pissapput, tassani angutit Nuummi isikkammik arsarlutik pissartanngorniunneranni semifinalertoqassaaq.
Pingasunngornermi unamminerni aalajangerneqarpoq, iligiit sorliit semifinalinut anngunnersut.
Pulje 1-imi ajugaaniunnermi IT-79 Nagdlunguamut Ilulissaneersunut ajorsarput. Siorna ajugaasut aappaattut inissittut IT-79, ukiullu siuliani pissartanngortut, unamminerup aallartinnginnerani ajugaassangatinneqaraluarput, kisianni Iluliarmiut tamanna allaanerutikkusuppaat.
Tassami iligiit Avannaaneersut IT-79 5-0-imik ajorsartippaat, taamaalillutillu puljemi ajugaasuullutik.
Assit takukkit: Isertitsinerpassuit aamma ajugaaneq aalassatsitsisoq
Siorna pissartat ingerlaqqittut
Siorna pissartanngortut B-67 aamma semifinalernissaminnut piareerput. Taakku Siuterumut 4-0-imik ajugaareerlutik pulje 2-mi ajugaasuupput.
G-44 Qeqertarsuarmeersut puljemi tassani tulliullutik inissipput. Taakku Kagssassuk 6-2-mik ajugaaffigaat.
Assit takukkit: Nuummi GM aallartilluartoq
Semifinalimi siullermi Nagdlunguak' aamma G-44 unammissapput, Nuummersuinnaallu B-67 aamma IT-79 unamminerup aappaani naapissapput.
Arfininngorpat Siuterok Nanortalimmeersut aamma FC Malamuk Uummannarmeersut ajugaasut tallimaattut inissinniunnermi unammissapput, TM-62 Kulusummeersut aamma Kagssassuk arfineq-aappaattut inissinniutissapput.
Atuaruk: Isikkammik arsarluni GM-ernissami unammeqattaartussat aaku