pissartanngortoq
Iligiiaarluni eqaarsaarnermi EM-ertoqarnerani kalaaleq kuultinnaqataasoq
18-nik ukiulik Lars Møller Kristiansen Danmarki sinnerlugu Europami pissartanngoqataavoq. - Misigisaq assut paasiuminaappoq, oqarpoq
Eqaarsaarnermi angutit arnallu inersimasut iligiiaarneranni Danmark Europami pissartanngorpoq Islandimi Reykjavikkimi arfininngormat. Tassani 18-nik ukiulik Lars Møller Kristiansen pissartanngoqataavoq.
EM-imi pissartanngoqataanini paasiuminaatsippaa.
- Misigisaq assut nuannerpoq. Anngunniunnermi pingajuattuinnaq inissisimagaluarpugut. Naggataagulli torrallaavugut. EM-imi ajugaanerput paasiuminaatseqaara, Lars Møller Kristiansen Sermitsiaq.AG-imut oqarpoq.
Svendborgimi Fynimi najugaqarpoq.
Iligiiaarluni eqaarsaarnermi annertunerusumik ajugaasoqarsinnaanngilaq, timersuummimi tassani nunarsuarmi pissartanngorniuttoqarneq ajorpoq.
- Iligiinni arnat angutillu arfiniliupput. Team Gymimi timersorluni imminut piumaffiginissaq pisariaqarpoq, aamma iluatsitassat tamaasa iluatsittariaqartarlutik ajugaassagaanni. EM-ertoqalinnginnerani ujaminnanniarluta anguniarparput, kuultinnannerpulli assut nuannerpoq, Lars Møller Kristiansen oqaluttuarpoq.
Ukiuni pingasuni eqaarsaarneq aalluppaa, sapaatip akunneranut arfineq pingasoriarluni sungiusartarpoq.
- Angutit iligiiaarneranni siunissami EM-eqataasuruppunga, taakkumi pikkorinnersaapput. Aamma siunissami Nuummut angerlarusuppunga sungiusaasunngorlungalu, Lars Møller Kristiansen oqaluttuarpoq.