Ileqqussaasunik siunnersuisoqatigiinnik pilersitsisoqalerpoq

Nunarput ileqqussaasunik siunnersuisoqatigiinnik peqartariaqarpoq. Taama isumaqarpoq IA'minngaanneersoq Bendt B. Kristiansen, taanna ullumi siunnersuut Inatsisartunut saqqummiussissaaq.

- Siunnersuisooqatigiit sammisassaat tassaassapput apeqqutit ileqqorissaarnermut tunngasut imaluunniit apeqqutit Kalaallit Nunaanni inuiaqatigiinnut peqqissutsimullu tunngasut attuumassteqartulluunniit, tassunga ilanngullugit Aana apeqqutit inatsiseqarnermut tunngasut. Siunnersuisooqatigiit aamma Naalakkersuisunik, Inatsisartunik pisortatullu oqartussaasunik apequtinut ileqqorissaarnermut tunngasunut siunnersuisuusassapput, Bendt B. Kristiansen (IA) siunnersuummini tunngavilersuilluni allappoq.

- Inuiaqatigiit ineriartornitsinni ileqqorissaarnermik oqariartuuteqartarnerit ulluinnarni inuttut pissuserissumik ataqqinnittumillu avatagiisitsinnut pissuseqartussaanitsinnik tunngaviliisussaasut kinguaariit nikittarneranni allanngoraluttuinnarnerat oqallisaasarpoq.

- Ileqqussaasut eqqortut suuppat, kialuuna ilusilersugassarigai? Isumaqarnarpoq oqallinnikkut inuiaqatigiit tamanna ilusilersussagaat.

Ileqqussaasut siunnersuisoqatigiinnik pilersitsisoqarnissamut isumassarsiaq Naalakkersuisunit taperserneqarpoq.

- Ileqqussaasunik siunnersuisooqatigiit inuiaqatigiinni assigiinngitsut oqallisigineqartariaqartunik siunnersuisooqatigiinnilu allani sammineqarneq ajortunik eqqummaaritsitsilersinnaanera Naalakkersuisut isumaqatigaat.

- Assersuutigalugu inuit peruluttut anniarneri millisinniarlugit nakorsaaneq imaluunniit inuiaqatigiinni paqumigineqartut ileqqunut ilitsoqqussanullu tunngassuteqartut eqqumaffigineqaleqqullugit suliaqarsinnaavoq, Peqqissutsimut Naalakkersuisoq, Agathe Fontain (IA) akissuteqarluni allappoq.

Taanna tikkuaavoq, siunnersuisoqatigiit politikkimut attuumassuteqannginnissaata pingaaruteqarnera.

Bendt B. Kristiansenip (IA) siunnersuutigaa, siunnersuisoqatigiinni inuiaqatigiinni susassaqarfinnit assigiinnitsuniit qulingiluanik ilaasortaqarnissaa.