Inatsisartut
Ilaqutat akiliunneqartanissaannut akerliulluni digitalikkut atsiornernik katersineq
Inatsisartuni ilaasortat ilaqutaasa akiliunneqarlutik angallanneqartanissaannut siunnersuut innuttaasup iluarinagu akerliussutsimik digitalikkut atsiorfissamik pilersitsivoq
Salik Bianco Jeremiassen Nuummiinngaanneersoq tallimangormat internettikkut atsiornernik digitaliusunik katersuivimmik pilersitsivoq.
Inatsisartut Siulittaasoqarfiata Inatsisartuni ilaasortanut Nuup avataaninngaanneersut ilaqutaasa ukiumut marloriarlutik akiliunneqarlutik angalernermut ineqarnermullu akiliunneqartalernissaannut siunnersuuteqarnera, isumaqatiginngilluinnarpaa.
- Siunnersuut kamassutigeqaara. Piumasaannarmik pingaarnersiviusoqarpoq. Maanna killiffipput politikerinit paasineqartariaqartoq isumaqarpunga. Uuliaamik nassaarsimasuungutta aningaasaaterpassuaqarlutalu, taava politikerit ilaqutaasa pingasoriarlutik angalatinneqarnissaannut immaq akissaqanngaluarpugut, taamatulli inissisimanngilluinnarpugut, atsiornernik katersinernik aallartitsisoq, Salik Bianco Jeremiassen Sermitsiaq.AG'mut oqarpoq.
Atuaruk: Politikerit ilaqutaannut akiliutsilluni angalanerit amerlanerusut
Ajornartorsiutit isiginngitsuusaarneqartut
Siunnersuutip unitsinneqarnissaa siunertaavoq, atsiornerillu katersarineqartut inuiaqatigiinni ajornartarsorsiutinut saatitsisinnaanissaa neriuutigineqarluni.
- Allaangilaq politikerit ajornartorsiutit isinngitsuusaarniarsarigaat. Ajornartorsiuteqarujussuarpormi, ingammik meeqqanut tunngassut, politikerilli iliuuseqarfiginngilaat. Isumaqarpunga siunnersuut inunnik uupakaatitsiniutaasoq, taanna isornatorsiuivoq.
Inuit politikerinik qatsussisut
Inuit amerlasuut atsiorsimanerat, Salik Bianco Jeremiassen nuannaarutigaa. Manna tikillugu 2630-t atsioqataasimapput.
- Inuit amerlasuut uattuulli eqqarsartartut takutippaa. Inuit Kalaallit Nunaata politikki pillugu qatsussinerat paasisinnaalluarpara. Imminummi iluatatsinnissamut – imminuinnaq eqqarsaatigisutut – siunnersuutaavoq. Siunnersuullu atuutsinneqalernermini aningaasaqarnitsinnik malunnaataangaarunnanngikkaluartoq, siunnersuummi isumassarsiaq pakatsinarpoq. Politikerit qatsuppagut, taanna oqarpoq.
Kingusinnerpaamik ataasinngorpat
Atsiornerit 5.000-tit aangusinnaassallugit neriuutigaa.
- Inuit taama amerlatigisut peqataanissaat naatsorsuutigisimanngikkaluarpara. Tapersersorneqarnerali nuannaarutigeqaraa akisussaaffilerneqarlungalu. Ataatsimoorlutalu piviusunngortitsisinnaasugut aamma takutippaa, Salik Bianco Jeremiassen oqarpoq.
Taanna paasissutissiivoq, atsiornernik katersineq ataasinngorpat unitsinneqassasoq, unitsinneratalu kingorna Inatsisartunut ingerlateqqissamaarlugu.
Digitalikkut atsiornernik katersineq uani malinnaaffigiuk