Nuuk

Ilaqutariit meerartallit Nuummi juulliararsioqatigiinnissamut qaaqquneqarput

Meeqqanut inuusuttuaqqanullu suliniaqatigiiffik Nanu Børn ilaqutariinnut meerartalinnut Nuummi katersortarfimmi ukiut arfinilissaannik pissusamut juulliararsioqatigiinnissamut qaaqqusivoq

Siorna 'Meeqqat Juulliat' Nuummi katersortarfimmi aaqqissuunneqarmat assilisaq toqqorsivimmeersoq

Nuummi ilaqutariit meerartallit ukiormanna ilaqutariinnik meerartalinnik allanik juullisioqateqarnissaminnut periarfissinneqaqqipput. Suliniaqatigiiffik Nanu Børn ukiut arfinilissaanni aaqqissuunniakkaminut Meeqqat Juulliannik taasaminut Nuummi katersortarfimmut qaaqqusimmat.

Nanu Børnip aaqqissuussinissaminut pilersaarutaani ‘Meeqqat Juulliat’ ulluni marlunni ingerlanneqassaaq.

Aaqqissuussineq juulliaqqap aqagunnerani, marlunngornermi decembarip 23-ani aallartissaaq. Ullormi tassani ilaqutariit katersortarfimmi juullerpaluttunik qiortaaqatigiissapput katersortarfimmillu pinnersaaqatigiillutik æbleskivetoqatiutigalutik.

- Tamannalu nereqatigiinnermik naggasissavarput, Nanu Børnikkormiut taama allapput.

Juulliaraq
Tamatuma kingorna pilersaarutaavoq ilaqutariit meerartallit, aaqqissuussamut peqataarusullutik nalunaarsimasut, Dronning Ingridip Napparsimavissuata silataani juulliaqqami ullaap tungaani qulinut naapinnissaat. Tassani ileqqoq malillugu juulimaap qulingimiguulimmik minnera isiginnaassavaat.

- Kingorna katersortarfimmut majuaqatigiissaagut. Ulloq tamaat juullerpalaassaagut, qiortaaqatigiilluta, pinnguarluta pinnersaallutalu. Naalagiarusukkaannilu aamma naalagiaqatigiittoqarsinnaavoq ualikkut, Nanu Børn ilisimatitsivoq.

Juulliararsioqatigiinneq naggaserlugu ilaqutariit meerartallit nereqatigiissapput, kingornalu erinarsoqatigiillutik orpik kaavissavaat.

- Meeqqat tamarmik poortugassiassaqarput. Aaqqissuussarlu qulip missaani taamaatinneqassaaq.

Nanu Børn najoqqutaralugu meeqqanut ilaqutariinnullu aaqqissuussaq akeqanngilaq, kisiannili siumut nalunaareernissaq pisariaqarluni.

Nalunaarneq ullumikkut decembarip 19-ani kingusinnerpaamik Borgerservicemut pissaaq.

Powered by Labrador CMS