suliffissaaleqineq
Ilaqutariit arlallit nuutsissinnaavaat
Kommuneqarfik Sermersooq periarfissanik misissuivoq Illoqqortoormiuni ilaqutariit arlallit Nuummut nuutsinnissaannut
Ilaqutariit suliffissaaleqinermit eqqugaasut imminut pilersulernissamut allamut nuunnissaq periarfissarilersinnaavaat. Periarfissap tamatuma Illoqqortoormiuni ilaqutariinnut arlalinnut atornissaa Kommuneqarfik Sermersuup misissorpaa. Ilaqutariit arlalli nuunnissamut piareersimapput, kialli tamanna akilissavaa?
Kommuneqarfik Sermersooq Illoqqortoormiuni innuttaasunik apersuinikkut misissuisimavoq. Tassanilu apersuutigineqartut ilagaat imminut pilersorsinnaalernissaq anguniarlugu illoqarfimmut allamut nuunnissaq periarfissatut atorusunneqarnersoq. Inoqutigiit pingasut Nuummut nuunnissamut piareersimapput, ataatsit Tasiilamut ataatsillu Maniitsumut. Ilaqutariilli taakku nuunnermut akissaqanngillat.
Kommuneqarfik Sermersuumi kommunalbestyrelsep maanna misissorpaa namminersorlutik oqartussani nuttartarnermut aningaasaateqarfik aqqutigalugu nuunnerit aningaasalersorneqarsinnaanersut, kommunalbestyrelsep oktoberip aallaqqaataani ataatsimiissutaani tamanna allassimavoq.
Aporfissaasut ilagaat Nuummi inissaaleqinerujussuaq. Aningaasaqarnermut ataatsimiititaliap periarfissatut tikkuarpaa kommunip inissiaateqarfiani Iserit A/S-mi inissiat attartortagaanngitsut atorneqanngitsut utaqqiisaasumik atorneqarnissaat. Ilaqutariit namminerisaminnik inissarsisinissaannut taakku atorusunneqarput.
Nuutsitsinissap isummerfiginnginnerani aningaasalersornissaanut periarfissat kommunep maanna misissorpai.