Meeqqat inissinneqarsimasut

Ilaqitariit avissaartinneqarsimasut pingasut nutaamik periarfissinneqarput

Kommuneqarfik Sermersuumi ilaqutariit avissaartinneqarsimasut atugarliortut pingasut qanittukkut nutaamik initaartinneqassapput annertuumillu tapersersorneqarlutik, qitornatillu inissinneqarsimasut imminnut qaninnerulersinniarlugit aammalu atornerluinerannik qaangiisinniarlugit ilorraap tungaanut aallartillugit

Kommuneqarfik Sermersuumi suliniutikkut nutaakkut ilaqutariit avissaartinneqarsimasut pingasut nutaamik periarfissinneqassapput

Kommuneqarfik Sermersuumi imigassamik qitornanillu inissinneqarsimasunik ajornartorsiutinik unammilligassat qaqutigoortumik akiorniarneqlerput. Kommuneqarfik Sermersuumi Meeqqanut, Ilaqutariinnut Atuarfeqarnermullu Ingerlatsivimmit aqunneqartumik ilaqutariit avissaartinneqarsimasut imigassamillu atornerluisut pingasut Nuummi illumut attartukkamut ataatsimut inissinneqassapput, kommuni tusgaassiorfinnut nalunaarummi allappoq.

Annertuumik ikiorlugit

Ilaqutariit pingasut illumi tassaniinnerminni ilaqutariittut katsorsarneqassapput, angajoqqaallu atornerluinermut katsorsarneqassallutik, qitornaallu ilaatigut ilinniagassanik ikiorneqartassapput. Allatut oqaatigalugu, kommunip ilaqutariit atornerluinermik qaangiisinniarlugit imminullu napatileriarlugit annertuumik ikiorniarpai.

– Angajoqqaat akisussaaffiannik arsaarnagit taarsiullugu angajoqqaat akisussaaffimminnik tigusinissaannut ikiorniarpavut. Isumaqarpugut ajornartorsiutip qaangerniarnissaaanut periuseq pitsaanerusoq, Kommuneqarfik Sermersuumi Meeqqanut, Ilaqutariinnut Atuarfeqarnermullu Ataatsimiititaliami siulittaasoq Poul Hansen tusagassiorfinnut nalunaarutikkut allappoq.

Isumaliutaavoq ilaqutariit pingasut ukiup affaa angullugu illumi tassaniitinneqassasut, tamatumalu kingorna namminneq angerlarsimaffittaaminni imminnut napatinnissaannut annertuumik ikiorneqassapput.

Aningaasat atorluarneqassapput

Ilaqutariit pineqartut pingasut qitornaat katillugit arfineq-marluk inissinneqarsimapput, tamannalu kommunimut ukiumut 8 millioner koruuninik akeqarpoq. Suliniut anguniagaqarfiusoq naatsorsuutigineqarpoq ukiumi siullermi 4 millioner koruunit missaannik akeqassasoq, tamatumalu kingorna ukiumut 500.000 koruuninik akeqartassalluni. Taamaasilluni suliniummut aningaasat atorluarneqassapput.

– Manna tikillugu ajornartorsiutinik iliuuseqartarnivut meeqqanik inissinneqartunik amerlanerusunik kinguneqartarsimapput. Taamaattumik nutaamik eqqarsartariaqarpugut. Uninngatitsiinnarneq periarfissaajunnaarsimavoq, Poul Hansen tusagassiorfinnut nalunaarummi allappoq.

Suliniut aallaaveqarpoq Meeqqanik sammisaqarnermi Pilersitseqqinnissamik pilersaarummik Kommuneqarfik Sermersuumi kommunalbestyrelsip akuersissutigisimasaanik.

Powered by Labrador CMS