Flytrafik

Ilaasut Kangerlussuarmi allatut misissortalissavaat

Timmisartumut ilaasut imerpalasut suut tigumiaannakkatut nassatarinerlugit februaarip aallaqqaataaniit eqqumaffiginerulertariaqassavaat

EU isumannaallisaanermut nakkutilliinermut tigummiartakkani nassatani imerpalasunik nassataqarnermut tunngatillugu nutaanik piumasaqaateqalerpoq. Nunanut allanut Kalaallit Nunaannit angalasunut maleruagassat malillugit angalasut 1. februarimit tigummiartakkani nassataminniittuutitik imerpalasut takutittalissavaat. Tamatuma saniatigut 100 ml. sinnersimagaanni apersorneqarnissaq naatsorsuutigineqartariaqassaaq.

- Angalasutut imerpalasunik nassatanik nammineq isumannaallisaanermik suliaqartunut takutitsisarnissaq sungiuttariaqassaaq 1. februarimit. Kangerlussuarmi angalasut periuseq nutaaq sungiutipallassagaat naatsorsuutigaarput, Mittarfeqarfiit isumannaallisaanermut ingerlatsisuat Jens Chr. T. Nielsen oqarpoq.

Nalilersinnaanngilaali isumannaallisaanermik suliaqartarneq sivikillissanersoq sivitsussanersorluunniit.

- Angalasut namminneq imerpalasut nassatatik soorlu nakorsaatit, meeraaqqat nerisassaat, eqqiaatit allallu namminneq nassatatik qaqittassappatigit periuseq sukkanerulersinnaavoq, kisiannili aamma sivisunerulersinnaanissaa periataarsinnaavoq, Jens Chr. T. Nielsen nassuiaavoq.

Maleruagassat nutaat imerpalasumik qanoq annertutigisumik nassarsinnaaneq allanngortinngilaat. Tigummiartarissani nassatani imerpalasup puua suli annerpaamik 100 ml.-imik (deciliteri ataaseq) imaqarsinnaassaaq. Tigummiartarissani nassatani imerpalasumik puulimmik ataatsimit amerlanerusunik nassartoqarsinnaavoq, kisianni akimut ersittoq puussiaq én literimik imaqarsinnaasoq kisiat ulikkaarlugu. Erseqqissaatigineqassaarli taamaallaat meeraaqqat nerisassaat, nakorsaatit allallu napparsimasunut nerisassat aalajangersimasut kisimik 100 ml. sinnerluguit nassarneqarsinnaassammata.

EU-p malittarisassai amerikamiut malittarisassaannut assingunerulerput, piffissarlu ungasinnerusoq eqqarsaatigalugu assigiilernissaat anguniagaavoq. Naak Kalaallit Nunaat EU-mut ilaasortaanngikkaluartoq Kangerlussuaq EU-mi pitsaassusermut atuuttumut akuerisaaqqavoq, taamaattumillu maleruagassat taakku malittussaallugit, angalasut nunanut allanut angalalernerini.

Powered by Labrador CMS