Ilaasut eqqaarsaartarfimmi unnuisariaqarsimapput

Ippassaq, ullumilu marlunngornermi ullaap tungaani, illoqarfiit pingaarnersaannut Nuummut tassanngaannillu timmisartuussinerit kinguartinneqartarput, pujornera pissutigalugu. Tamanna pissutigalugu ilaasut 360-ingajaat apuunnissaminnut kinguaattoorsimapput.

– Ilaasut 300-t angullugit amerlassusillit Kangerlussuarmi unnuisariaqarsimapput. Ilaasut 35-t Narsarsuarmi unnuipput, ilaasullu 24-it Maniitsumi unnuillutik, Air Greenland Sermitsiaq.AG-mut taamatut paasissutissiivoq.

Siniffiit patitittakkat atorneqarput

Ilaasut 300-t, Kangerlussuarmi unnuisariaqarsimasut, tamarmik akunnittarfimmi vandrehjemmimilu inissaqarsimanngillat. Ilaat eqaarsaartarfimmi unnuisariaqarsimapput.

– Unnuiffiusinnaasut naammassimanngillat taamaattumik eqaarsaartarfik atorneqarpoq, tassani siniffiit patittakkat atorneqarlutik, Air Greenland paasissutissiivoq.

Maanna Nuummi pujoq kivisimavoq, immikkullu timmisartuussisoqarpoq. Taamaattumik naatsorsuutigineqarpoq ilaasut ullumi, marlunngornermi, apuuffissaminnut apuunneqarumaartut.