Ilaasunut akitsuutip appartinniarneqarnera soqutiginnilersitsivoq

Umiarsuarnik takornariartitsisarneq pillugu Miamimi takutitsisoqarnerani Nunatsinnit peqataasut oqaluttuarereeraallu Inatsisartut umiarsuarmut ilaallutik takornarianut akitsuutip appartinneqarnissaanut siunnersuut piffissami matumani suliarigaat, umiarsuuatileqatigiissuit maannamut ilaasunut akitsuutigitinneqartut pissutigalugit nunatsinnut tikittarnissaminnut takorluugaqarsimanngitsut isumaat allanngorluinnarpoq.

- Ukiormanna uppernarsivarput akitsuutit qaffasissut kiisalu angalaartitsisarnermut tuniniaaqqittarnerit aningaasarsiffigineqarsinnaannginneri, umiarsuaatileqatigiit anginerit isertitaasa sisamaraarterutigisartagaat, sunniuteqarluinnartuusut, Anders la Cour Vahl Visit Greenlandimeersoq oqarpoq.

Imalu nangippoq:

- Kisianni aamma nunat tamalaat Issittumi umiartornermut malittarissaasa nutaat, kiisalu Kalaallit Nunaani angalanermut malittarisassat sukaterneqarsimaneri aamma sunniuteqaqataasut nalornisitseqataasullu umiarsuaatileqatigiit Kalaallit Nunaannut tikittarnissaannut pilersaarusiornissamut.

Ukiuni kingullerni Kalaallit Nunaanni umiarsuarmik takornariartartut pillugit kisitsisit takutitsipput umiarsuit mikinerit ingerlalluartut ineriartortullu, kisiannili umiarsuit akunnamik angissusillit 500 aamma 1200 missaanik ilaasoqartartut tikittarnerat 67 procentimik appariarsimavoq, taamatullu aamma umiarsuit 1200-t sinnerlugit ilaasoqartartut 2010-mit tikittarnerat 50 procentimik appariarsimasoq.