timmisartup ajutoornera
Ilaasoq: Minnginnitsinni sequnngerpunga
Naak ilaasut sakkortuumik misigisaqaraluartut timmisartup iluani uippallertoqanngilaq. Timmisartumi ilaasup misigisani oqaluttuarai
- Timmisartoq meriitsiaannarluni sisuulerpoq, Pauline Mathiassen Dash 8-imi pingasunngornermi ullaakkut Ilulissat mittarfiani ajutoortumi ilaasoq oqarpoq.
Timmisartup pingasunngornerup ullaavani nalunaaqutaq 08.45 minnerani anorlingaatsiarpoq.
- Timmisartup minnginneranni timmisartumi innuttamit nalunaarfigineqarpugut timmisartoq aalajumaartoq. Timmisartup tunuata tungaani issiavunga, milernermilu sequnngerlunga. Sakkortuumik mippugut, kinguninngualu sakkortuumik minnertut ittoq malugeqqippara isarussakkalu katappakka. Taamaasimmat paasivara timmisartoq ajutoortoq, Pauline Mathiassen 60-inik ukioqartoq Sermitsiaq.AG-mut oqarpoq.
Ikiorserneqarput
Timmisartoq mittarfiup ungataanut sisoorpoq, timmisartorlu sivinganikkut sisooreerluni unippoq.
Timmisartumi ilaasut sasamat napparsimaviliaanneqarput.
- Uippallertoqanngilaq. Soorunami pisumut tupappugut. Timmisartumi inuttat suliassartik suliarilluarpaat, taamaattumillu timmisartumik ilaasut uippallinngillat. Ilaaqatitta ilaata saqisoq ikiorlugu timmisartup matua tukerpaa ammartillugu, ilaasullu tamaasa anisinnaalersillugit, Pauline Mathiassen oqaluttuarpoq.
Timmisartumi ilaasut aqqaneq-marluk Hotel Arctic-imi Air Greenlandimit naapeqatigiisinneqarput pisumullu nassuiaanneqarlutik.
- Misigisaq sakkortoqaaq. Timmisartumi innuttat nersualaarusuppakka sulilluarnerannut. Tarnip pissusaanik ilisimasalimmik oqaloqatiginninnisssamik periarfissinneqarpugut, misigisarput pillugu oqaluttuarisinnaanngortillugu, Pauline Mathiassen oqarpoq.
Timmisartoq sooq ajutoornersoq suli ilisimaneqanngilaq. Timmisartut ajutoorsimanerinik misissuisartut ulluni qaninnerni misissussavaat sooq ajutoortoqarnersoq.