Ikummatissat akikillissapput

Issileraluttuinnaleruttortoq Polaroil-imit nutaarsiassaqarpoq pitsaasumik. Gasuuliap, petroliup benzinallu akii decembarip aallaqqaataani appartinneqassapput.

– Ikummatissarsinermi akiliutaasup amerikamiut dollariata nalinga ukiormanna aggustimi ikummatissap akinganik qaffaanermi tunngavigineqartoq ilimagisamit maannamut appasinnerusimavoq.

Taamatut tusagassiorfinnut nalunaaruteqarpoq Polaroil.

Tamatuma saniatigut, Polaroil nalunaarpoq, Polaroil-imi ingerlatsinermi sulisoqarnermilu aningaasartuutit ataatsimut isigalugu sipaarfiusimapput, kiisalu atortuutinik attartortitsinermi naatsorsuutigissatinnit isertitaqarnerusimalluta.

Polaroil-ip akigititai 1. decembari 2014-imiit imaalissapput:
Gasolie/diesel: Literimut 6,65 kr.-imiit 6,41 kr.-imut, avatangiisinut akitsuut literimut 10 øreusoq ilanngullugu.
Petroleum: Literimut 6,76 kr.-imiit 6,52 kr.-imut , avatangiisinut akitsuut literimut 10 øreusoq ilanngullugu.
Benzin: Literimut 6,50 kr.-imiit 6,26 kr.-imut, avatangiisinut akitsuut literimut 10 øreusoq ilanngullugu.

Nunarsuarmi akit aalajangiisuunngillat

Polaroil naapertorlugu akinik appaaneq Juni 2014-p kingorna uuliap akuigassap uuliallu akuiarneqarnerani nunarsumi akit apparsimanerannik tunngaveqanngilaq.

– Siusinnerusukkut nalunaarutigeriikkatsitut uuliamik akuiagassamik uuliamillu akuiarneqareersumik 2014-mi pisinitsinni aalajangersimasumik akiliinissaminik KNI A/S Polaroil isumaqatigiissuteqarpoq. Isumaqatigiissutit taakku niuerfinnut aningaaserivinnullu assigiinngitsunut pisinermi attavigineqartartunut isumaqatigiissutaapput.

Ukioq manna ikummatissanik eqqussuineq naammassineqareerpoq, tassa eqqussineq kingulleq pimmat novembarimi. KNI A/S Polaroil-ip naatsorsuutigaa aappaagu apriilimi eqqussuineq nanginneqassaoq, Polaroil nalunaarpoq.