akit
Ikummatissamik pisineq akikinnerulertoq
Novembarip aallaqqaataani akit 18 øremik appariassapput
Gasolie, petroliu aamma benzina literimut 18 øremik akikillissapput, Polaroil ilisimatitsivoq.
Akit nutaat novembarip aallaqqaataani atuutilissapput:
- Gasolie/diesel: literimut 5,93 koruunimiit 5,75 koruunimut appartinneqarpoq avatangiisinut akitsuut literimut 10 øreusoq ilanngullugu.
- Petroleum: literimut 6,04 koruunimiit 5,86 koruunimut appartinneqarpoq avatangiisinut akitsuut literimut 10 øreusoq ilanngullugu.
- Benzin: literimut 5,78 koruunimiit 5,60 koruunimut appartinneqarpoq avatangiisinut akitsuut literimut 10 øreusoq ilanngullugu.
- Jet A-1 (timmisartup orsussaa) literimut 18 øremik akikillissaaq, 5,96 koruunimiit 5,78 koruunimut.
Atuaruk: Polaroilimut suliaq aatsaat taama annertutigisoq
Sisamassaat
Akikilliliineq una september 2014-ip kingorna, nunarsuarmi ikummatissap akiata appariartulerneraniit, akinik appaanerit sisamassaraat.
Ikummatissap akia 2014-imi aasaanerani taamaalilluni literimut 90 øremik akikinnerulerpoq, tamannalu ukiumut 112 millionit koruunit missaanni atuisartunut oqilisaassissaaq.
Atuaruk: Polaroil inuiaqatigiinnut millionerpassuarnik sipaaruteqartitsisoq
Tikittussaq kingulleq
Ukioq manna ikummatissamik Nunatsinnukaassassaq kingulleq, Göteborgimi ullualunnguit qaangiuppata umiarsuarmut issoraanneqassaaq, novembarillu qiteqqunnerani Nuummut Kangerluarsorutsimullu nunnigunneqassalluni.
Tunumut Qaanaamullu ukiussamut peqqumaasersuineq naammassineqareerpoq, Nunattalu sinnerani inoqarfinnut ukiussamut peqqumaasersorneq ingerlanneqassalluni, Polaroil ilisimatitsivoq.