Nuuk
Ikumatitap nuna Nuup eqqaani ikuallatsikkaa
Nuummi qatserisartut Qoornup qeqertarsuani nuna ikuallattoq marlunngornermi qatseriartorpaat
Illuaqqat asiartarfiit Qoornup qeqertarsuata avannamut sammisortaaniittut nunap marlunngornermi ikuallanneranit eqqorneqangajapput. Ikuallanneq illuaqqanut suli anngutinngitsoq qatserisartut qamippaat.
Nunap ikuallalerneranik qatserisartut nalunaaqutaq 15.00 kalerrinneqarput qatserinerlu naammassineqarpoq nalunaaqutaq 23.00.
Illuaqqat eqqannguanni
- Paasisavut malillugit ikumaartitamit ikuallanneq aallartissimavoq. Kisianni inoqanngilaq, taamaammat ilisimanngilarput ikuallanneq qanoq ililluni siaruaassimanersoq, Nuummi qatserisartut pisortaata tullia Miki Høegh Sermitsiaq.AG-mut oqarpoq.
Qatserisartut pumpit atorlugit imaaniit imeq atugassartik pissarsiaraat.
- Illuaqqat ilaat ikuallannerup meterinik arlaqanngitsuinnarnik ungasitsigilersimagaluarpaa. Ikumaartitsinermi uani mianersuaalliortoqarsimavoq nunalu maanna panertorujussuuvoq. Taamaammat asimi angalasut tamaasa kajumissaarumavagut innermik atuinermi mianersorluinnartaqullugit, Miki Høegh oqarpoq.
Taassuma oqaluttuarnera malillugu nuna ikuallaleraluartoq annertunngilaq aammalu portunngitsumiilluni. Taamaasillutik sissami pumpiniit slangit ikuallattoq angusinnaasimavaat.