Ilulissat
Ikuallarujussuartoqarnerata kingorna qatserisartut marluk unitsinneqartut
Ilulissani qaarnertalimmik ikuallattoqarnerata kingorna politiit takunnittunik ujartuipput. Piaaraluni ikuallatsitsisoqarnersoq, politiit maanna misissorpaat
Sapaammi unnukkut kingussukkut Ilulissani qaarpallattoqarujussuarpoq, illoqarfimmi sumiiffinnit arlalinnit tusaaneqarsinnaasumik. Royal Greenlandip illoqarfimmi fabrikkiani qaartoqarnera pivoq.
Politiit, qatserisartut aamma napparsimmavik qaartoqarneranit sapaammi nalunaaqutaq 22.04 nalunaarfigineqarput. Politiit ikuallattumut apuummata illorsuup avannamut isuata nalaani innerit sakkortupput, tamannalu annertuumik pujoqartitsivoq.
Taassuma kingorna fabrikkimi sulisut qimagussortinneqarput, sumiiffimmilu mattussisoqarpoq. Aatsaat ataasinngornermi ullaakkut nalunaaqutaq 03.30 qatserisartut ikuallattoq qamippaat, politiit tusagassiuutinut nalunaarummi allapput.
Qatserisartut marluk unitsinneqartut
- Ikuallattumik qamitsiniarneq ikuallattut annertussusaanik aamma ornikkuminaanneranik ajornakusoortitsivoq. Naak suliamik ilisimasalinnik sulisoqaraluartoq, qatserisartut marluk misissugassanngorlugit unitsinneqarput, Ilulissani politiit pisortaat, Carl Sværd oqarpoq.
Politiit takunnittunik arlalinnik sumiiffimmi apersuereerput, taakku ilagaat aalisartut pisumut takunnittut, aammalu piaaraluni ikuallatsitsisoqarnersoq paasiniaanermi paasinarsaasinnaagunartut.
Ilulissanili politiit takunnittunik amerlanerusunik ujaarlerput, ikuallattup aallartinneranut pasinartumik takunnissimasinnaasut, imaluunniit ikuallannermut pissutaasumik ilisimasaqarnerusunik.
Ilulissani politiit oqarasuaammut attavigineqarsinnaapput: 70 14 22