Ikiuineq maanna tamakkiisumik ingerlavoq

Kalaallit Røde Korsiata (KRK) ippassaq Uummannami qitiusumik kiffartuussivik ammarpaa. Aallartinnermiilli ulapittoqarpoq.

Inunnut 160-nt atisanik, nerisassanik aamma eqqiluisaarnermut atortunik agguaasoqarpoq. Nerisassarsiniarnissamut allagartanik 40.500 koruunit nalinginut agguaassisoqarpoq. Aammattaa meeqqat 60-it pinngussanik agguaassiffigineqarput.

- Nuannarineqartorujussuupput, Kalaallit Røde Korsianni siulittaasoq, Christina Tønder Bell oqarpoq.

Qimagussorneqartullu piumassuseqarluarlutik ikiuussimasut, aamma taassuma oqaluttuaraa.

- Røde Korsimi sulisup containerip imaarnissaanut ikiorneqarnissamik pisariaqartitsimmat, qimagussorneqartut ilaat ataaseq aperaa, minutsillu qulit qaangiuttut kajumissutsimik ikiuukkusuttut 20-t aggerlutik containerimik imaarsillutik atisanik immikkoortiteripput, taanna oqarpoq.

Qimagussorneqarsimasut nammineerlutik ikiuunnissamut nukissaat atorneqarnissaannut KRK-mit pingaartinneqarpoq.

- Inuit imminut pilersornermik sungiusimasuupput. Kisianni ajunaarnersuaqarnerani nammineq aqussinnaanngisaminnik inissisamalersinneqarput. Maanna nammineq aalajangikkaminnik pisinnaanngoqqinnissaat pingaaruteqarpoq, Christina Tønder Bell oqarpoq.

Tamaattumik kajumissutsiminnik sulisut pingasut aamma ataqatigiissaarisut marluk, nunaqarfinnit marlunnit qimagussorneqarsimasut ulluni siullerni ilaatigut oqaloqatigaat, qanoq pisariaqartitaqarnersut aamma qanoq kissaateqarnersut paasiniarlugu.

Pisattanik ikiunerup saniatigut KRK-mit aamma tarnikkut tapersersuinissaq ukkatarineqarpoq.

Najugaqartut psykologimik oqaloqateqarnissaminnik pisariaqartitsisut ippassaq unnukkut oqaloqatiginnissinnaasimapput. Tassanilu amerlanerit arnat meeqqallu aggerput.

Tamatuma saniatigut ataatsimoorluni sammisaqartitsinernik pilersitsisoqassaaq. Aamma inersimasut tassani pineqarput, taakku nunaqarfinni ataatsimoortarnertut periarfissaqassapput.

Kisianni ingammik meeqqanut sammisassarpassuarnik pilersitsisoqarniarpoq. Røde Kors nunani tamalaani meeqqanut sammisassaqartitsinissamut amerlasoorpassuarnik peqarpoq. Pinnguaataasinnaapput, sunngiffimmi ornittagaq, biograferneq imaluunniit taakku assigisaannik.

Eqqumiitsuliortut aamma Uummannamut takutitsiartornissaminnut neqerooruteqareernikuupput.

- Tamakku sammisaqartitsinerit meeqqanut tamanut Uummannamiittunut ingerlanneqassapput, tassani najugaqarnerat imaluunniit nunaqarfinnit taakkunannga marlunneersuunerat apeqqutaatinneqarani, Røde Korsimi siulittaasoq oqarpoq.