Upernavimmi angallannikkut kinguaattoortut
Ikiorneqalerput
Ilaasut kinguaattoorussaasut sapaatip akunnerata naanerani ingerlanniarneqarnissaat sulissutigineqarpoq
Upernaviup eqqaani angallannikkut ingerlassineq "immikkuullarilluinnartutut" taaneqarsinnaavoq. Taamaammat Air Greenlandip nunaqarfinnut sapaatip akunnerata naanerani angallassiniarnera Sikorskyenimit ikiorserneqassaaq. Qulimiguulik ilaasunut angummanniarnermut ikiuuttussaassalluni.
Sapaatip akunnerini pingasuni kinguaattooqqapput
Upernaviup eqqaani angallassineq novembarip 21-nili pilersaarutaasut malinnagit ingerlasimavoq. Silarlunngikkuni, teknikkikkut ajutoorneq pissutaasimalluni. Ilaasut ilaat angallannermi kinguaattoornermi eqqungaasoq Sermitsiaq.ag-p attaveqarfigaa. Taanna ulluni qulini kinguaattoorussaasimalluni.
Air Greenlandip angallannermut naalakkersuisoq Martha Lund Olsen ippassaq ataatsimeeqatigimmagu angallannermi kinguaattoortoqarnera immikkut iliuuseqarfigineqartariaqartoq inerniliutigineqarpoq.
Atuaruk: Air Greenland: Kiffartuussinissamut isumaqatigiissutit suli atsiorneqanngillat
- Sapaatip akunnerata naanerani immikkut timmisartuussisoqassaaq, pissutsillu immikkut ittut pissutigalugit S61’ip angalatinneqarnissaanik Issittumi Sakkutooqarfik akuerseqqammerpoq, Air Greenland tusagassiuutinut nalunaarummi allappoq.
Issittumi sakkutooqarfik ikiuivoq
Taama aalajangerneq Issittumi Sakkutooqarfiup kisimi aalajangigarigaa timmisartortitseqatigiit naqissuserpaa.
- Taanna Air Greenlandimit qujamasuutigineqarpoq, Air Greenland allappoq.
Maannakkorpiaq ilaasussat 94-it ornitassaminnut apuunnissaminnik utaqqisut ingerlatitsiviup nalunaarutigaa. Piffissap ingerlanerani qulimiguulik Uummannameersoq ikiuuppoq, aammalu Qaanaap eqqaaniit qulimiguulik ikiuunnissaa sulissutigineqarsimasoq, ingerlatitsiviup erseqqissarpaa.
Silarluppoq
Qulimiguulik Qaanaamit Upernaviliartinniarneqarsimagaluarpoq, tamannali angallavimmi isorartuumi sila pissutigalugu pisinnaasimanngilaq. Pisulli aaqqiivigineqarnissaanut suliniuteqartoqapallattariaqartoq ataatsiminnermi aalajangiunneqarpoq.
Atuaruk: Naalakkersuisoq: Aaqqiissutissat akikinnerpaartaat nassaaraarput
- Air Greenlandip paasitippaannga sapinngisartik tamaat, timmisaartuussinissaraluit taamaatiinnartariaqarsimasut apuuffissaminnut apuunnissat isumaginiassallugu. Aammataaq Air Greenland-ip oqaatigivaa, ilaasussatik kinguaattoornermik eqqorneqarsimasut, apuuffissamminnut apuunneqarnissaannut pilersaarutiminnik paasitinneqassasut, Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq Martha Lund Olsen ippassaq ataatsimiinneq pillugu oqaaseqarpoq.
Angalanissamut billetsit pisiarineqarsinnaanngungajalerput
Air Greenlandip iluatsittumik timmisartuussinissat anguniarlugit periuuseriniagaat tatigilluinnarlugu aamma oqaatigaa, 2017-mullu angallassinissamut billetsit juullertinnagu pisiarineqarsinnaanngornissaat oqaatigalugu.
- Ilanngullugu oqaatigissavara angallannermut isumaqatigiissutit atuutilernissaanut tunngatillugu, Air Greenland ulluni qaninnerpaani 2017-mi angalanissanut bilitsit tuniniarlugit aallartissammatigit, Martha Lund Olsenip tusagassiuutinut nalunaarummini taama allappoq.