Ikioqquneq: Kusassaataannaavunga?

Innarluutillit Illersuisuat Christina Johnsen ippassaq 2019-imut aningaasanut inatsisissatut siunnersuut atuaramiuk assut pakatsissutigalugulu aliasuutigaa.

Innarluutillit Illersuisoqarfiat ullumikkut 2,5 millioner koruuninik pissarsisarpoq, aningaasanut inatsisissatut siunnersuut ataasinngormat Naalakkersuisunit saqqummiunneqartoq naapertorlugu taakku ukiuni tulliuttuni allannguuteqassanngillat.

Taanna illersuisoqarfiup sulineranut politikkikkullu naatsorsuutit anguneqarnissaat pillugit aningaasanik qinnuteqaqqullugu, Isumaginninnermut Naalakkersuisumit Anthon Frederiksenimit oqarfigineqartarsimavoq.

Angalanissaq ajornartoq

- Aningaasaatigut akissarsianut, akiligassanut ingerlatsinermullu aningaasartuutinut tamangajaasa atortarpagut. Sinerissamiluunniit innuttaasut naapinniarlugit angalanissamut akissaqanngilagut, Christina Johnsen nassuiaavoq.

Taassuma oqaluttuaraa, tapiissuteqartartut akornanni suliffeqarfiup ingerlanneqarnerinut ikiorsiisarnerat ileqquunngitsoq.

-Angalanermut aningaasartuutit tunngavilersuutigalugit qinnuteqaasiorsinnaanngilagut, innarluutillit illersuisuat assersuusiorpoq.

Taanna nuannaarutigeqisaminik Nuna Fondenimit aningaasanik pissarsisimavoq, aningaasalli pissarsiarisimasai 120.000 koruunit misissuinissamut naammanngillat.

- Aamma illersuisoqarfik suli ataasiinnarmilluunniit angusaqarsimatinnagu avataaniit aningaasanik pissarsiniarneq ajornakusoorpoq, taanna oqarpoq.

Nuanniilliortoq

- Politikerit suliakkiussimasaat tapiissutitullu aningaasaliissutigisimasaat qiviarukkit nuannerpallaanngillat, taanna oqarpoq, paasisinnaanngilaalu aningaasaliissutit MIO-mut tunniunneqartartutut amerlatigingimmata. Meeqqanut innarluutilinnullu suliassat assigiittuttut, taanna naliliivoq.

- Taamaattoqarsinnaanngilaq. Politikerinit kusassaataannartut ivertinneqarsimallunga eqqarsaatigisarpara. Kusarnartunik oqalullutillu kusanartumik siunertaqarput taamaattoq innarluutillit puiungaaqqasut iliuuseqarfiginissaat qulakkeerusunngilaat, taanna erseqqissaavoq.

Sulilu neriuppoq

Christina Johnsenip suli neriuutigaa aningaasanut inatsimmi aningaasaliissutit amerlineqarnissaat politikkikkut amerlanerussuteqartunit taperserneqassasoq. Ippassaq aningaasanut inatsisissatut siunnersuut maanna Inatsisartuni isumaqatiginninniutigineqassaaq taassumalu neriuutigaa nunatsinni illersuisoqarfiup nutaap annertunerusumik aningaasaliiffigineqarnissaa politikerinit allanit taperserneqassasoq.

- Taamaanngippat Kalaallit Nunaat tamakkerlugu illersuisoqarfiusinnaanngilagut, taanna erseqqissaavoq.

Powered by Labrador CMS