Ikiaroornartunik eqqusseriartut misissuisoqarnerani paasineqartut
Akileraartarnermut Aqutsisoqarfimmi ilanngaaserisut Kangerlussuup Mittarfiani sapaatip akunnerani 37-mi immikkut misissuipput. Tassani ikiaroornartoq 200 gram arsaarinnissutigineqarpoq
Kangerlussuarmi tikittut aallalersullu, angalasut nassataat tamakkerlugit nassiussallu immikkut ittumik misissuiffigineqarput sapaatip akunnerani 37-mi.
Arsaarinnissutit:
- Ullut sisamat ingerlanerini arsaarinnissutigineqarput
- ikiaroornartoq hash 194,7 gram
- Sikaritsit kartonngit 16-it
- Imigassat 7,7 literi
- Viinni ataaseq
- Sikaritsit puussai 1000-it
- Immiaaqqat 4 literi
- Ilaasut arlaqartut skannerneqarput ataasiakkaallu Politiinut eqqusseriarsimasutut misissugassanngorlugit tunniunneqarlutitk. Taakku saniasigut aningaasanik tigummiaqartut aammalu sulisinnaanermut najugaqarsinnaanermullu akuersissutinik peqanngitsut misissuiffigilluarneqarsimallutik, Akileraartarnermut Aqutsisoqarfik tusagassiutinut nalunaarummi allappoq.
Akiliisitsissutigineqartut katillugit 19.222,-kr.-iupput.
Ilikkagaqarfiulluartoq
- Misissuineq annertuumik ilikkagaqarfiuvoq , siunissamilu Kalaallit Nunaanni ilanngaaserisut misissuinerannut pilersaarusiornermi iluaqutaajumaarluni. Akileraartarnermut Aqutsisoqarfimmi naatsorsuutigineqarpoq immikkut misissuinerit taamatut ittut pinaveersaartitsinermik sunniuteqarluarumaartut, tusagassiutinut nalunaarummi ilisimatitsissutigineqarpoq.