Nuuk
Ikiaroornartumik eqqussuisimasutut arfineq marluk eqqartuussaasut
Sermersuup Eqqartuussiviani ikiaroornartumik hashimik eqqussuisimasut eqqartuussaapput
Pingaarnertut akisussaasoq Danmarkimi najugalik ikiaroornartumik hashimik suliami annertuumi Sermersuup Eqqartuussiviani hashimik 20 kilo sinnerlugu eqqussuisimasutut eqqartuunneqarpoq. Inuit arlallit suleqatigalugit Danmarkimiit Nunatsinnut eqqussuisimavoq,
Sermersuup Eqqartuussiviata eqqartuussut ataasinngornermi nalunaarutigaa ikiaroornartut hashi pillugu inuit qulingiluat sassartinneqarfigisaanni. Inuit arfineq marluk katillugit ukiuni 14-ni pinerluuteqarsimasunut inissiisarfimmiittussanngortinneqarput.
Pingaarnertut akisussaatinneqartoq Danmarkimi angerlarsimaffeqartoq ukiuni sisamani pinerluuteqarsimasunut inissiisarfimmiittussanngortinneqartoq politimestereqarfimmi unnerluussisuuneq Lars Kirkegaard nalunaarpoq.
Politiit ukiup affaa missaliorlugu paasiniaasimapput. Eqqartuussineq assigiinngitsuni arlalinni ingerlanneqarsimavoq.
- Unnerluussisussaatitaasut eqqartuussissutit assut naammagisimaarpaat. Unnerluunneqartut annertuutigut piumasagut malillugit eqqartuunneqarput eqqartuussinerlu pivoq suliani ikiaroornartumik hashimik eqqussuinermi annertuumik aningaasatigut iluanaaruteqarfiusumi eqqartuussinermut najoqqutassaq malillugu. Paasiniaanermut annertuumut eqqartuussissutit angusaapput pitsaasut tassani suleqatigiit aaqqissuussaasumik sulisut piffissami sivisuumi hashimik annertuumik eqqussuisimapput, Lars Kirkegaard oqarpoq.