ikiaroornartulerineq
Ikiaroornartulerisut pillugit suliami politiit affarmik ajorsartut
Eqqartuussivik Kujallermi Qaqortumi angut 52-nik ukioqartoq unnerluunneqartoq pinngitsuutinneqarpoq. Angut sivisuumik isertitsivimmiittussatut politiinit unnerluunneqaraluarpoq
- Angut ikiaroornartumik toqqorsisimasutut, aningaasanik nassiussisimasutut, allakkanik nakkartitsivimmik aserorterisimasutut, saftimik savap quttoraanillu tillissimasutut pinngitsuutinneqarpoq.
Kujalleq Eqqartuussivimmi Qaqortumiittumi eqqartuussineq taamatut eqqartuussut nipaqarpoq. Kujataani ikiaroornartumik tuniniaanermik suliaq taamatut inerneqarpoq.
Angut 52-nik ukiulik sivisunerusumik parnaarussivimmiittussatut politiinit unnerluutigineqaraluarpoq. 2.000 koruuninik kiisalu ikiaroornartumik 0,2 gramimik paarisaqarsimaneranut akiligassinneqarpoq.
Unnerluunneqartup aappaa, 49-nik ukiulik, ikiaroornartumik tuniniaanermik ingerlatsisuusutut eqqartuunneqarpoq. Ikiaroornartumik 4,2 kilo ataannagu tuniniaasimasutut pisuutinneqarpoq - aamma tigusarineqarnermi nalaani ikiaroornartumik annikinnerusumik paarisaqarsimasutut pisuutinneqarpoq. Ukiup affaa avillugu parnaarussivimmiittussanngortinneqarpoq, iluanaarutigisimasaanullu aamma assaarinnittoqarluni.
1.500.000 koruunit tungaannut arsaarinnissuteqartoqarpoq, tassani biilit aamma aquuteralak arsaarinnissutigineqarput.
Eqqartuunneqartup aalajangiunneqartut akuerai. Suliap aappaanut tunngassuteqartumut politiit Kalaallit Nunaata Eqqartuussivianut ingerlateqqippaat.
Ikiaroorniutinut ilisimatooq: Suleqatigiittoqartarpoq
Aalborg Universitetimi kriminologimi lektori, Kim Møller, ikiaroornartunik tuniniaasarneq oqaaseqarfigaa. Ikiaroornartunik tuniniaasut suleqatigiittartut oqaatigaa.
- Ikiaroortartut 90 procentii Danmarkimut eqqunneqartartut Marokkomeersuupput. Ikiaroornartup europap avannaaliaannissaa aamma Kalaallit Nunaaliaannissaa ajornakusoortuusarpoq. Christianiami kilomik ataatsimik pisiniariarluni angallassisoqartarnissaa ilimaginngilara. Suleqatigiittoqartarpormi.
Ikiaroornartulerisut pinerluttunit allanit sakkukinnerusumik pillarneqartartut lektorip oqaatigaa.
- Ikiaroornartoq angerlarsimaffinni pujortarneqartarpoq. Ikiaroornartup sunniutaa pissutaalluni imerajuttunit ikiaroortartut ajornartorsiortitsineq ajorput. Taamaattumik oqartussaasut ikiaroornartumik sulinerat annikinnerusunnaasarpoq, suliat allat pingaartinneqarnerusaramik. Ikiaroornartormi heroinisut navianartiginngilaq, taamaattumik tuniniaasartut politiinut oqaatigineqartarnerat akuttuneruvoq.