ikiaroornartoq
Ikiaroornartulerinermut suliami arfineq-marluk suli tigummigallarneqarput
Nunatsinni ikiaroornartulerinermik suliat annersaasa ilaanni tigummigallarneqartut arfineq-marluk ullumik eqqartuussivimmiipput. Tassani eqqartuussisup tigummigallarneqartut tigummigallarneqarnerat sapaatit akunnerini sisamanik ilavai.
Marlunngornermi taakku arfineq-marluk Nuummi Sermersuup Eqqartuussiviani eqqartuussisumut sassartinneqarput, tassanilu matoqqasumi tigummigallaganngorsitaasimanerat sapaatit akunneri sisamanik ilaneqarput.
Matoqqasumik ingerlatsineq
- Suliap matoqqasumik ingerlanneqarnera pissutigalugu paasissutissiarisinnaasakka killilerujussuupput, unnerluussisussaatitaasoq Tobias Berg oqaluttuarpoq.
- Ikiaroornartumik eqqussuinermut suliaq annertuvoq arlalinnik unnerluutiginninnertalik aammalu piffissap sivisuup ingerlanerani pissutsinik arlalinnik unioqqutitsiffiusoq, suliamilu misissuinerit suli maannamut ingerlanneqarlutik, Tobia Berg paasissutissiivoq.
Unnerluutigineqartut tunngaviusumik inatsit naapertorlugu killisiorneqareernerminnit politiinit killisiorneqarsimapput. Tamarmillu unnerluutigineqartunut pinngitsuunerarput.
Politiit annertoorujussuarmik suliaqarnerat
Piffisami sivisuumi misissuereerlutik marlunngornermi ulloq 25. juli politiit annertoorujussuarmik sulinertik aallartippaat. Aaqqissuulluakkamik Danmarkimi politiit suleqatigalugit politiit aallaaserlutik Nuummi najugaqarfiit arlallit Danmarkimilu najugaqarfik ataaseq ornippaat.
Angut Danmarkimi tigusarineqartoq ingerlaannaq Nuummukaanneqarpoq massakkulli tigummigallarneqarluni.
Angutit arfinillit arnarlu ataaseq
Pineqartut tassaapput angutit arfinillit arnarlu ataaseq. Tamangajammik 20-t missaani ukioq ataaserlu 30-t missaani ukioqarluni.