Inatsimmik allannguineq
Iginniarfimmi pisoq aallaavigalugu Inatsisartut iliuuseqartut
Meeqqanik pinerliisimannginnermut uppernarsaatinik piumasaqaateqartussaatitaaneq pillugu Inatsisartut inatsisaata allanngortinneqarpoq
Iginniarfimmi angut 40-ni ukiulik kinguussiutitigut atornerluisimanermi kingunerisaanik Herstedvesterimi piffissaligaanngitsumik parnaarunneqareersoq, meeqqanik pinerliisimannginnermut uppernarsaatinik piumasaqaateqartussaatitaaneq pillugu Inatsisartut inatsisaata allanngortitisipput ullumi pingasunngornermi.
Taasinermi politikkerit akuersillutik 14-t taasipput pingasullu taaseqataanatik. Inatsit taamaasilluni allanngortinneqarpoq.
Meeqqanut atornerluisartut pinaveersaartinniarlugit inatsit allanngortinneqarpoq. Siunnersuutip matuma siunertaraa meeqqanik pinerliisimannginnermut uppernarsaatip atuuffiata annertusinissaa, taamaaliornikkullu kinguaassiuutitigut meeqqanik pinerliisarneq akiorniarlugu suliniuteqarnerit annertusarnissaannut tunngavissiinissaq.
Angajoqqaarsiaasartut
- Kommunalbestyrelsip meeqqanik 15-it inorlugit ukiulinnik nalinginnaasumik angajoqqaarsianut, tassanngaannartumik angajoqqaarsiaasartunut, inuussutissarsiutigalugu angajoqqaarsiaasartunut aamma ilaqutariinnik oqilisaasunut inissiinernut atatillugu qularnaassavaa, angajoqqaarsiat imaluunniit ilaqutariinnik oqilisaasut illoqataasa 15-it sinnerlugit ukiullit tamarmik meeqqanik pinerliisimannginnermik uppernarsaateqarnissaat, taamatullu kommunip aaqqissugaanik namminersortutulluunniit angerlarsimaffimmi paarsisartunut, paarsineq paarsisuusup angerlarsimaffiani pigaangat, aammattaaq nuuttoqarnerani.
Inatsisaalersoq taamatut oqaasertaqarpoq.
Atuakkanik atorniartarfinni sulisut aamma assinganik piumasaqaateqarfigineqalissapput.
Inatsisartut inatsisaat atuutilerpoq 1. august 2015, atuuffigalugillu 1. august 2015-imiit atorfinitsitsinerit sulilersitsinerillu.