assit takukkit
Iggu - Nuummi café nutaaq ullumi ammarpoq
Uani tallimanngornermi Café & Restaurant IGGU Nuummi Sipisaq Avannarlermi ammarpoq
Café Pregomit pizzat maqaasigaanni, taava nutaarsiassatsialaqarpoq.
Tassami Nuummi café/neriniartarfiit nutaajunersaat, netcafeusimasumi Baristami - Cafe Iggu ammarpoq.
Iggu illoqarfiuup qeqqata avatinnguani inini alianaatsuni aaqqissuunneqarpoq, tassanilu ikinngutit ilagalugit eqqissilluni unnussiuaartoqarsinnaassalluni ilaquttalluunniit pizzatoqatigineqarsinnaassallutik.
Nioqqutissat pitsaasut
Nioqqutissani tunngaviusussat tassaapput pizzat mamarluartut Pregomeersut, tamatumanilu piumaneqarnerpaat soorlu Hangover aamma De Tre Små Grise suli pisiarineqarsinnaassallutik.
Tamatuma saniatigut nerisassiat Italiami nerisassioriaatsinit isumassarsiarneqarsimasut pissanganartut arlalissuit pisiarineqarsinnaassapput. Café ikerinnakkut nererusuttunut hapserinik tapasinillu aamma sassaalliuteqartassaaq.
Iffiukkat tamarmik nammineerluni iffiugaassapput. Najorsilaarusuttunut aamma fadøleqassaaq pitsaalluinnartunik kaffinillu assigiinngiiaartorpassuarnik aamma pisiassaqassalluni.
Nutaarsiassaq nillataartoq
Illoqarfimmi nutaarluinnartut Iggu frozen yoghurtimik aamma sassaalliuteqartalissaaq. Yoghurtinik taamatut sassaalliuteqartarneq Danmarkimi nunarsuullu sinnerani atugaallualersimavoq.
Café nammineq suliarisimasaminik sassaalliuteqartassaaq, tamatumanilu nakkalaarutissat, paarnat allarpassuillu yoghurtimut nutaamut atorneqarsinnaasut assigiinngitsut arlaliussallutik.
Frozen yoghurtimik sassaalliuteqartalernissaq qilanaaraarput Nuummiunillu qanoq qisuariarfigineqarnissaa pissanngatigalugu.
Ullup-qeqqasiulaarnermut imaluunniit kinguleqqiutitut peqqinnartutut ajunngilluinnartuuvoq, Jonas Lastelin, Café & Restaurant Iggumi ulluinnarni aqutsisoq, erseqqissaavoq.
Suliumasorpassuit
Café & Restaurant Iggup ammarneqarnissaanut atatillugu Nuuk Cafe, neriniartarfimmut tunuliaqutaasoq, sulisussarsiorsimavoq.
Tamatumanilu soqutiginnittoqartorujussuunera maluginiarsimavaat, tamannalu Jørgen Pedersenimit nuannaarutigineqarluinnarluni.
Taamaattorli igasumik pikkorissumik suli amigaateqarput. Ulluinnarni aqutsineq Isabell Hansenimit Jonas Lasteinimillu, Nuuk Cafémi ukiorpanni sulisimasunit isumagineqassaaq.
Ussernartorsiornartumik inissisimaffeqartoq
Café nutaaq Sermitsiaq.AG-mi aaqqissuisoqarfimmut ussernartorsiornarunaqisumik tusagassiorfiup saniliatut inissisimassaaq, aviisillu Sermitsiaq AG-lu naammassiniarlugit unnutsiannguaq tikillugu sulisoqaleraangat cafép aallerfigineqartarnissaa ilimagineqaannarsinnaalluni.
Iggu igasumik immikkut suleqataasussamik nassaartoqarnissaata tungaanut aatsaat nal. 16.00 ammartassaaq, tamannali iluatsippat ullup-qeqqasiornissamut aamma ammasalissalluni.
Ulloq angisooq
Iggu tallimanngornermi maajip 27-ani ammassaaq, piffissamilu 15.00-imii 17.00-imut tamanut ammatitsisoqassalluni sassaalliutissallu immikkuullarissut pizzallu ilisimaneqarluareersut ooqatttaarneqarsinnaassallutik.
Café og Restaurant Iggumi sulisut tamarmik tallimanngornermut qilanaartorujussuupput, suliniut nukippassuarnik atui gisimasarput kiisami ammarsinnaanngussagatsigu. Sumiiffik pitsaassutsimik kiffartuussilluarnermillu tunniussaqarfiusussaq, Jørgen Pedersen neriorsuivoq, paasissutissiillunilu Iggu aamma Facebookimi qupperneqartoq.
Uani sapaatip-akunnerani oqaluttuat amerlanerusut Nuuk Ugeavisimi atuakkit