Igasa Foodfestivalimi pilersaaruterpassuit

Igasa Foodfestistival septembarip aallartinnerani ingerlanneqassaaq, tassanilu pilersaaruterpassuaqartoq Narsami Inuilimi ilinniartitsisoq Marie Toftdahl ilisimatitsivoq.

Kujataani pisoqarfiussaaq
- Nanortalimmi, Qaqortumi, Narsami, Alluitsup Paani Narsarsuarmilu sassaalliisoqartassaaq. Tassani igasut, inuit nerisassiortartut meeqqallu sassaalliisassapput.

Festivalertitsisoqarnerani savaatillit nuliaat kiisalu savaatillit nerisassiarisartagaat qitiutinneqassapput.

- Ruuanik, rababarinik mameladelianik, pølsilianik assigiinngitsunillu allanik qanoq sanasoqartarneranik takutitsisoqassaaq. Soqutiginartunik nerisassaliortaneq kinguaanut ingerlateqqinneqarnissaat pingaartipparput, Marie Toftdahl oqarpoq.

Nerisassioriaatsit
Oqaluttuarisaanermik paasititsiniaasoqassanngitsoq oqaatigaa, kisianni tunisaqarsinnaanissaq misiliisitsisinnaanissarlu anguniarneqarpoq.

Igasa Foodfestivalimi savaatillit nuliaat kisimik sammineqassanngillat.

Tassami savaatillit aamma qaaqquneqassapput, tassani savat qanoq aamma nerisassaliarineqartarnersut paasititsiniaassapput.

Immamit nerisassat
Kujataani aalisartut piniartullu aamma ingerlateqqissinnaasaat aamma sammineqassapput.

- Sumiiffiit tamarmik assigiinngitsunik suliaqartarput, aamma aalisartut piniartullu tamanna takutissavaat, Marie Toftdahl oqarpoq.

Nanortalimmi Alluitsup Paanilu puisinik panertitsisoqartarpoq. Puisip orsua paarnanik akullugu ilaatigut aamma sassaalliutigineqassapput.

Nanortalimmit panertitat
- Spaniamiup aalisakkamik tarajorteriaasaa aamma takutinneqassaaq. Nanortalimmi uukkat pisarineqartut Spaniami tunisaasarput. Innuttaasut ilisimatinneqassapput qanoq suliarineqartarnersut, Inuilimi ilinniartitsisoq oqaluttuarpoq.

- Hotellit festivalertitsisoqarnerani suleqatigineqassapput. Tassani puisimik nerisassiatik sassaalliutigissavaat. Hotellit namminneerlutik tamanna suliarissavaat, oqarpoq.

Narsami aalisartut piniartullu aamma ilikkakkatik takutissavaat, tamannalu Marie Toftdahlip takussallugu qilanaaraa.

- Nerisassiornissamik pikkorissarneqaqqammerput. Ilikkagarisimasatik aamma takutissavaat sassaalliutigissallugillu, soorlu eqalussuup nuliata neqaanik kiisalu eqalussuarmik qernertamik suliaqarnissamik pikkorissarnerminni ilikkakkatik takutissallugit, Marie Toftdahl oqarpoq.

Nerisassiortarnissaq
Nerisassiorneq kikkunnut tamanut soqutiginartunngorlugu Igasa Foodfestival aaqqissuunneqarpoq. Tassani meeqqat, inersimasut utoqqaallu peqataasinnaapput.

Igasa Food Festivalip anguniagai paasissutissami atuakkit.

'Pinngortitap atugassarititai' qaammammi matumani Sermitsiaq.AG-mit sammisarineqarpoq. Pinngortitamit nerineqarsinnaasut aggustimi sammineqassapput - allaaserineqartut uani atuakkit

Siunnersuutissaqarpit oqaluttuassaqarpilluunniit? Taamaappat Facebookkikkut allaffigitigut imaluunniit netredaktion@sermitsiaq.ag allaffigiuk