Igalikumi seqernup qinngornerinik sarfaliuutit aamma anorip nukinga atorlugu sarfaliorneq

Nukissiorfinnit aalajangersarneqarpoq Igalikumi atortunik misiligutaasunik ikkussuinissaq.

Atortuni misilerarneqassaaq seqerngup qinngornerinik sarfaliuutit, anorip nukinga, sarfaliamik batteerinut uninngatitsineq aamma generatori dieselimik ingerlatsilik taakku ataatsimoortillugit naammaginartumik Kalaallit Nunaanni ingerlasinnaanerat, kiisalu sumiiffinni mikinerusuni innaallagissamik pilersuineq aalaakkaasoq aamma aningaasaqarnikkut orniginartoq qulakkeerneqarsinnaanersoq.

Suliniut januaarimi 2016-imi neqerooruteqartitsivigineqassaaq, naatsorsuutigineqarporli augustimi atorneqalernissaa.

Nukissiornerit arlallit
Pilersaarut tassaavoq pingaarnertut aasaanerani Igaliku innaallagissamik pilersorneqassasoq, seqerngup qinngornerinik sarfaliuut aamma anorip nukinga atorlugit.

Seqinermik aamma anorimik nukissiorneq aalaakkaasuunngilaq, taamaattumik sarfaliamik batteerinut uninngatitsinerup ullup unnuallu ingerlanerani nikeranngitsumik pilersuineq qulakkiissavaa. Maannakkut generatori dieselimik ingerlatilik pigineqartoq tamatumunnga ilutigitillugu seqinermik aamma anorimik nukissiornermut sillimmataassaaq, kisianni naatsorsuutigineqarpoq generatori dieselitortup aasaanerani uninngatsinneqartarnissaa.

Ukiukkut seqernup qinngornerata sakkortussusia naammanngilaq, kisianni anori generatorilu dieselimik ingerlatilik ataatsimoorlutik iluaqutigineqarsinnaassapput.

Sipaarfiussaaq
Tamatuma saniatigut sarfaliamik batteerinut uninngatitsiviup generatorip dieselimik ingerlatillip pitsaanerpaamik ingerlanissaa qulakkiissavaa, taamaallitik batteerit ullup ingerlanerani immerneqassallutik, tamatuma kingorna nunaqarfik unnuakkut batteerinik pilersorneqartassalluni.

Tamanna dieseluuliamik sipaarfiussaaq tamatumunngalu ilutigitillugu gerneratorip piusinnaanera sivitsorneqassaaq.

Nukissiorfiit misilittakkat taamaaliornikkut katersorniarpaat, 2017-imi sanaartornissap pilersaarusiorneqalinnginnerani.

Dieseluuliamik annertuumik eqqussuisartut
Igaliku toqqarneqarpoq nunap sannaata qanoq innera, nalunaaquttap akunnerini qanoq amerlatigisunik seqinnertarnera tunngavigalugit aamma ukioq kaajallallugu tikinneqarsinnaaneranut pitsaaqutit.

Suliniut iluatsippat taava seqernup, anorip, sarfaliamik batteerinut uningatitsisarneq aamma generatori dieselimik ingerlatillip ataatsimoortinneqarnerat sumiiffinni allani 2017-imi aamma 2018-imi misilerarneqassapput, taamaaliornikkut aalajangersaanissamut tunngavissat pitsaasut pilersinneqarsinnaassammata siunissami annertunerusumik atorneqalersinnaajunnarnerannut.

Seqerngup, anorip aamma sarfaliap batteerinik uninngatitsinerup ataatsimoortinneqarnerat generatori dieselimik ingerlatsilik ilanngullugu, taava naatsorsuutigineqarpoq maannakkut Igalikumi dieselimik atuinerup 50 procentiata sipaarneqarsinnaanera maannakkut ukiumut 55.000 literersuarnik eqqussukkamik annertussuseqartup, generatorip dieselimik ingerlatillip atorneqarsinnaanerata sivitsorneqarsinnaanera kiisalu Kalaallit Nunaata 'qorsuunerulernissaata' anguneqarsinnaanerat.