Igaliku: Hiistit tikilluaqqusipput

Kunngikkormiut tallimanngormat Itilliminngaanneerlutik nunaqarfik qulaanit alakkaramikku nunaqarfiup hiistiutaanit 15-it missaanniittunit tikilluaqquneqarput.
Igalikumi pilersaarutigineqartut tamangajaviisa ingerlanneqareersut prinsiaqqallu prinsesseeqqallu meeqqat tamaasa hoppeborgimi pinnguaqatigereeraat prins Christianip Josef Motzfeldt ornippaa aperalugulu ATV-mik peqarnersut. Taanna misilikkusuppaa, namminerooq tappavani taassuma assinga mikisunnguaq pigigamiuk.
– Taavalu prins Christian aquttoralugu APV-mik biilerpugut, siullermik nunaqarfimmi kingornalu Kongevejikkut, tamaanilu hiistit ivigartorput. Prins Christianip qamutdit unitsippai, hiistillu tamaasa pikkoreqaluni ilassiorlugit. Kingorna angajoqqaavi qatanngutaalu takkupput. Kunngissap marlulissat nassarlugit kunngissallu nuliata Isabella nassarlugu. Hiistit sammilluareerlugit tamatta Itillimukarpugut, tassani Dannebrog umiarsuarlu alapernaarsuut Triton utaqqisut. Meerartaat aallarumavallaanngikkaluarput ikinngutitaatik hiistillu sivisunerulaartumik najorusullugit, Josef Motzfeldt oqaluttuarpoq.
– Hiistit tamarmik Igalikumi savaatilinnit arfiniliusunit pigineqarput. Savatullu hiistit aamma ineqartinneqassapput. Nunaqarfimmi hiistit 15-it missaanniipput. Ukiakkut savanik ungoorinerinnavimmut atorneqartarput. Marloriarluni savanik ungoorisoqartarpoq. Siullermik oktobarimi-septembarimi toqoraanissaq sioqqullugu. Aappassaanik savat tamarmik maajimi savat inaannut katersorneqassagaangata, Josef Motzfeldt oqaluttuarpoq.