Ida Heinrich Sisimiuni tusarnaartitsissaaq

Operamik erinarsortartoq Ida Heinrich, sapaatiuppat Kuunu Berthelsen peqatigalugu Taseralimmi tusarnaartitsissaaq

Operamik erinarsortartoq Ida Heinrich aamma erinarsortartoq Kuunu Berthelsen sapaammi oktobarip 14-anni nalunaaqutaq 15.00 Sisimiuni Taseralimmi tusarnaartitsissapput, pattattartoq Søren Johannsen ingiorteralugu.

Juunimi 2018-imi operamik erinarsortartoq Ida Heinrich aamma erinarsortartoq Kuunu Berthelsen pattattartoq Søren Johannsen ingiorteralugu nuuteeqqamik nutaamik immiussipput. Maanna nuuteeqqap ‘’Pigaara ilunni assit’’ nipigissarneqarnera naammassivoq, tunisassiarineqarneralu ingerlavoq. Nuuteeraq CD/DVD-tut novembarip ingerlanerani saqqummissasoq naatsorsuutigineqarpoq.

Nuuteeqqamit nipilersukkat uani ualikkut tusarnaartitsinermi ilisaritinneqassapput.

Kalaallini operamik erinarsortartutut ilinniarsimasut siullersaat Ida Heinrich Nuummeersoq, uani nuuteeqqami erinarsortartoq inuusuttoq piukkunnaatilik Kuunu Berthelsen Qeqertarsuarmeersoq suleqatigaa. Taakku erinarsukkanik asanninnermut aamma inuunermi qujamasunnermut tunngasunik erinarsorput, siullermeerlutillu pattattartoq Søren Johannsen ingiorteralugu tusarnaartitsissapput.

- Una tusarnaartitsineq asseqarnavianngitsoq qularutiginngilara, Taseralimmi attaveqatigiinnermut suliniummilu ataqatigiissaarisoq, Nuka Alice Lund oqarpoq, tamatumalu saniatigut tusarnaariat Idap maanna peqqissutsimigut qanoq inneranut paasinninnissaannik qinnuiginnippoq.

Una tusarnaartitsineq, qulinik ukioqalereersimasunut killilerneqarsimasoq, taalliortut aamma erinarsukkanik nipilersortartunillu sungiusarnerpassuaqarnerani pisinnaasimavoq, kiisalu najukkamit aningaasaliisoqarneratigut. Aaqqissuussaaq Angunnguaq A/S-mit aamma Sømandshjemmet Sisimiunit aningaasalerneqarpoq.

Powered by Labrador CMS